09 сентября 2006 г.
Сентябрĕн 5-мĕшĕнче пирĕн ентеш, СССР летчик-космонавчĕ, икĕ хут Совет Союзĕн Геройĕ Андриян Григорьевич Николаев чĕрĕ сывă пулнă пулсан, çитмĕл çичĕ çул тултарнă пулĕччĕ. Паттăр кăйкăр ячĕпе пирĕн районта Калайкасси шкулĕ Тата районти ача-пăча библиотеки хисепленсе тăраççĕ. Сумлă ентешĕмĕре хисеплесе районта та, республикăра та мероприятисем ирттереççĕ.
Андриян Григорьевича халалласа сентябрĕн 6-мĕшĕнче район администрацийĕн çурчĕ умĕнче митинг пулса иртрĕ. Район администрацийĕн пуçлăхĕ Ю.А.Иванов сăмах каларĕ:
- Эпир паттăр кăйкăр ятне асра тытма, çÿле çĕклеме тивĕç. Унăн ячĕ сире ăнăçусем тума хавхалантарса пытăр, - терĕ вăл.
Ун хыççăн Муркашри вăтам шкулта вĕренекенсем Муркаш-Калайкасси-Шупашкар маршрутпа чупăва тухрĕç. Çакă хастар çамрăксене ĕçре, вĕренÿре çитĕнÿсем тума хавхалантарĕ. Юрий Александрович спорта юратакансене вăрăм çула ăнăçлă чупса тухма сунчĕ.
Источник: "Çĕнтерÿ ялавĕ"