30 марта 2016 г.
![Муркаш енĕн «кĕмĕл» сасси Муркаш енĕн «кĕмĕл» сасси](../UserFiles/news/20160330/3_(1)_Preview.jpg)
Чăваш наци конгресĕ Чăваш Ен Экономика аталанăвĕн, Культура министерствисен тата ытти пĕрлешÿсем пулăшнипе мартăн 26-мĕшĕнче Шупашкарти филармони залĕнче регионсем хушшинчи «Кĕмĕл сасă» фестиваль конкурс ирттерчĕ.
Çак фестивале пирĕн районти клубсен централизациленĕ тытăмĕн художество пултарулăхĕн ертÿçи, Çурлатринчи «Çеçпĕл» эстрада ушкăнĕн юрлаканĕ Алена Филиппова хутшăнса пысăк çитĕнÿпе таврăнчĕ. Пĕччен юрлакан юрăçсенчен вăл виççĕмĕш вырăна тухма пултарчĕ.
- Çак çитĕнÿшĕн эпĕ питĕ савăнтăм, мĕншĕн тесен пирĕн ăсталăха (эпир пурĕ вăтăр саккăрăн пултăмăр) питĕ сумлă жюри хак пачĕ: РФ искусствăсен тава тивĕçлĕ ĕçченĕ С.Кондратьева, ЧНК президенчĕн пĕрремĕш çумĕ – ЧР культурн тава тивĕçлĕ ĕçченĕ В.Клементьев, ЧР халăх артисчĕ В. Хричтофоров тата ыттисем те, - пĕлтерчĕ Алена.
Çак çитĕнÿ Аленăна татах та пысăк ÿсĕмсем тума хавхалантарасса, районта тата республикра пурăнакансене илемлĕ юрăсемпе савăнтарма вăй-хăват парса тăрасса шанатпăр.
Н.Николаева
Источник: "Çĕнтерÿ ялавĕ"