12 января 2013 г.
Январĕн 3-6-мĕшĕсенче Çĕрпÿ хулинче бокс енĕпе республика ăмăртăвĕ иртнĕ. Ку сăн ÿкерчĕкре эсир шăпах ăмăрту çĕнтерÿçисене пьедестал çинче сумлă йышра куратăр. Денис Грачевпа Геннадий Балканов (иккĕшĕ те Калайкассинчи вăтам шкулта вĕренеççĕ) 40 кг категори виçинче 1-мĕш тата 2-мĕш вырăнсем çĕнсе илнĕ. Вĕсен кĕрешĕвĕпе О. Сютруков тренерпа С. Черкашин аслă тренер кăна мар, республикăн спорт тата туризм министрĕ С. Мельников, тĕнче чемпионĕ, профессионал боксер О. Маскаев та кăмăллă юлнă.
Ăмăртура пирĕн район чысне тата тепĕр 6 çамрăк боксер хÿтĕленĕ. Ачасемпе çамрăксен районти спорт шкулĕн Юнкăри уйрăмĕнче ăсталăха туптакан Виталий Алексеев (78 кг категори виçинче) çĕнтерÿçĕ пулса тăнă. Алексей Корчагин вара (57 кг) виçĕ кĕрешĕве те питĕ ăнăçлă вĕçленĕ - 1-мĕш вырăна тухнă. Çапла майпа хальхи вăхăтра Олимп резервĕсен училищинче вĕренекенскер, вăл Чăваш Енĕн пĕрлештернĕ командине кĕме пултарнă. Çитес вăхăтра Алексей республика чысне Атăлçи шайĕнчи ăмăртура хÿтĕлĕ.
Çĕрпÿри ăмăртура пирĕн районти тепĕр виçĕ боксер (пурте Муркашри вăтам шкулта вĕренеççĕ) 3-мĕш вырăнсене йышăннă: Станислав Кожевников (56 кг), Денис Рыжков (54 кг) тата Петр Петров (52 кг).
Хастар боксерсене малашне те ăнăçу сунатпăр. Çак кунсенче Лысково хулинче иртекен ăмăртура та ÿсĕмсем тумалла пултăр.
Источник: "Çĕнтерÿ ялавĕ"