27 апреля 2013 г.
Шкулта вĕренекенсем хушшинче ирттерекен «Манăн пулас пенси» республика олимпиадин пĕрремĕш тапхăрĕ вĕçленчĕ. Муркашри вăтам шкулта 11 «А» класра вĕренкен Дарья Михайлова районта çĕнтерсе финала тухрĕ. Шăпах ĕнтĕ унăн «Пулас пенсие епле ÿстермелле» электрон презентацине районта чи лайăххи тесе палăртнă. Дарья Михайлова район чысне Шупашкарта олимпиадăн юлашки тапхăрĕнче хÿтĕлерĕ, хăйне лайăх енчен кăтартрĕ, лауреат пулса тăчĕ. Финал РФ Пенси фончĕн республика уйрăмĕнче апрелĕн 18-мĕшĕнче иртрĕ. Пенси тематикипе Чăваш Енре пуçласа ирттерекен олимпиада йĕркелÿçисем - РФ Пенси фончĕн республика уйрăмĕ, ЧР Вĕренÿ тата çамрăксен политикин министерстви. Партнерсем шутĕнче Раççей Перекет банкĕ тата патшалăх тытăмне кĕмен «КИТ Финанс», «Промагрофонд», «РГС», «Большой пенсионный фонд», «Образование и наука» пенси фончĕсен филиалĕсем.
Пенси фончĕн районти управленийĕ
Источник: "Çĕнтерÿ ялавĕ"