27 октября 2012 г.
2012 çулхи сентябрĕн 25-мĕшĕнче Раççейре вĕренекен çамрăксен пенси пĕлĕвне ÿстерессипе вĕрентÿ проекчĕ пуçăнчĕ. Чăваш Республикинче Пенси фончĕн пур офисĕсемпе районсенчи уйрăмĕсенче те Пенси пĕлĕвĕн пĕрлехи кунĕнче шкулсенче аслă классенче вĕренекенсемпе студентсем валли экскурсисем йĕркелерĕç, «Пенси пирки çамрăклах шухăшла» темăпа видеоурок ирттерчĕç. Ăна видеоçыхăну мелĕпе РФ Пенси фончĕн Чăваш Республикинчи уйрăмĕн управляющийĕ Роза Кондратьева ертсе пычĕ. Пенси фончĕн районти управленийĕнче çав кун Муркаш шкулĕнче 11-мĕш «А» класра вĕренекенсем пулса курчĕç.
Видеоурока Чăваш Республикин Вĕрентÿ тата çамрăксен политикин министерствин шкул çулĕчченхи тата пĕтĕмĕшле вĕрентÿ пайĕн пуçлăхĕ Вячеслав Бычков та хутшăнчĕ. Вăл республикăри шкул ачисемпе педагогсене çавна каласа пачĕ. Пенси фончĕпе республика Вĕрентÿ тата çамрăксен политикин министерстви пĕрле туса хатĕрленĕ килĕшĕве тĕпе хурса иртнĕ çул çамрăксем хушшинчи пенси пĕлĕвне ÿстерессипе пысăк ĕç туса ирттернĕ.
Фонд специалисчĕсемпе пĕрле пенси тематикипе шкулсенче, профессипе техника училищисенче, аслă вĕренÿ заведенийĕсенче 1000 ытла факультатив урокĕпе лекци ирттернĕ. Вĕсенче пенси законодательствин тытăмĕпе 20 пин ытла вĕренекен паллашма пултарнă. Занятисенче Чăваш Ене тÿлевсĕр илсе килнĕ 10 пин экземпляр Пенси фончĕн учебникĕпе, буклетсемпе тата памяткăсемпе усă курнă.
Пенси тематикипе шкул ачисем хушшинче сочиненисен республикăри конкурсне ирттернĕ. Конкурса 134 вĕренÿ заведенийĕнчен пурĕ 310 сочинени тăратнă. Конкурсра çĕнтернĕ 12 участника дипломсем, вĕсен педагогĕсене вара Тав çырăвĕсем парса хавхалантарнă. Çĕнтерÿçĕсем хăйсен сочиненийĕсен хăш-пĕр пайĕсене Чăваш Наци радио эфирĕнче вуласа панă.
Пĕрлехи пĕлÿ проекчĕн тепĕр тапхăрĕ вăл шкулсенчи «Манăн пулас пенси» электронлă хаçатсен Шупашкар хулинчи конкурсĕ пулса тăрать. Асăннă конкурс çĕнтерÿçисем спонсорсенчен - банксемпе патшалăхăн шутланман пенси фончĕсенчен - дипломсемпе парнесене тивĕçнĕ.
Пенси пĕлĕвĕ енĕпе факультатив урокĕсем 2012 çулхи декабрь уйăхĕчченех иртмелле. Республикăна тÿлевсĕр çĕнĕрен илсе килнĕ 20 пин учебник, брошюрăпа памятка ачасемпе вĕренекенсемшĕн пысăк пулăшу пулса тăрать. Вĕренекенсен пенси пĕлĕвĕн шайне вара пенси тематикипе ирттерекен олимпиада кăтартса парĕ. Ăна çитес çулталăк пуçламăшĕнче ирттерме палăртнă.
Сăн ÿкерчĕкре: пенси тематикипе шкул ачисем валли пĕлмелли сахал мар. Йышлăн хутшăнчĕç вĕсем видеоурока.
Источник: "Çĕнтерÿ ялавĕ"