17 октября 2012 г.
Чăваш Республикин Тĕп суйлав комиссийĕн председателĕ Александр Цветков вырăнти хăй тытăмлăх органĕсен вăхăт тухмасăрах ирттернĕ тата хушма суйлавĕсенче сасăланин малтанхи итогĕсем çинчен пĕлтернĕ.
Пĕтĕмĕшле илсен, суйлав лăпкă лару-тăрура, йĕркеллĕ иртнĕ. Ответлă структурăсем - вырăнти хăй тытăмлăх органĕсем, ĕç тăвакан влаç органĕсем, Чăваш Республикин Пуçлăхĕн администрацийĕ, пур суйлав комиссийĕсемпе право сылавĕн органĕсем пĕрле çыхăнса ĕçленĕ. Кăтартусем объективлă, суйлавçăсен шухăш-кăмăлне туллин палăртаççĕ.
Суйлавçăсен активлăхĕ суйлавран суйлава ÿссе пынине палăртмалла. Активлăх енĕпе Чăваш Ен Раççей шайĕнче малти 10 регион шутĕнче. Суйлавçăсен списокĕсене кĕртнисен 60 ытла проценчĕ суйлав участокĕсене пырса сасăлама кăмăл туни - питĕ лайăх кăтарту. Ку вăл интересленекен структурăсем çыхăнса пахалăхлă ĕçлени пирки калать. Районсемпе илес пулсан, Вăрнар, Шупашкар, Тăвай, Елчĕк, Пăрачкав районĕсене лайăх енчен палăртмалла.
Кăтартусем объективлă терĕмĕр. Вырăнти хăй тытăмлăх органĕсен суйлавĕ çавăнпа та уйрăлса тăрать. Суйлавçăсем чи малтанах конкретлă çыншăн, шанăçа тивĕçнишĕн, ялта хăйсем пурте пĕлекеннишĕн сасăлаççĕ. Çавна май кун пеккисен çĕнтерĕвĕ те сумлă.
Республикипе пĕтĕмĕшле вакантлă 46 мандатшăн сасăлав иртнĕ. Ял тăрăхĕсен 25 пуçлăхне, район шайĕнчи 9 тата ял тăрăхĕ шайĕнчи 25 депутата суйланă. 46 мандатран 42-шне «Единая Россия» политика партийĕн представителĕсем тивĕçнĕ, 1 кандидата КПРФ сĕннĕ тата 3-шĕ - хăйсен кандидатурисене хăйсем сĕннисем.
Муркаш районĕпе Муркаш, Чуманкасси тата Йÿçкасси ял тăрăхĕсен пуçлăхĕсене суйланă. Суйлав итогĕсемпе Муркаш ял тăрăхĕпе Сергей Николаевич Ермолаев, Чуманкасси ял тăрăхĕпе Николай Валерианович Белов, Йÿçкасси ял тăрăхĕпе Анатолий Николаевич Кузьмин çĕнтернĕ. Вĕсем виççĕшĕ те «Единая Россия» политика партийĕн представителĕсем.
Источник: "Çĕнтерÿ ялавĕ"