26 сентября 2012 г.
Пěтěм Раççейри «Наци кросě - 2012» чупу, В. Егорова парнисене çěнсе илессишěн йěркеленě çăмăл атлетика кросě кăçал Муркашра питě хаваслă иртрě. Ватти-вěтти çулсеренех йышлă пухăнать стадиона. Кăçал çак ăмăртусенче пурě 800 ытла çын старта тухрě Уçă ăмăртура кÿршěри Мари Эл спортсменěсем кăна маар, Мускаври, Кострома, Иваново тата ытти облаçсенчи çăмăл атлетсем те пулчěç. Чи пěлтерěшли - çанталăк ăшă та уяр тăчě.
Хăнасем енчен те спорт уявě пуян килчě кăçал. Тěнче класлă спорт маçтăрěсем Вера Соколова, Нина Охотникова, Александр Яргунькин тата СССР тава тивěçлě спорт маçтăрě Алина Иванова спортсменсене саламласа ăнăçусем сунчěç.
Район администрацийěн пуçлăхě Р. Тимофеев: «Спорта юратăр: спорта юратни яланах пулăшса пырать», - тени кěçěнннисемшěн уйрăмах витěмлě пулчě пулас. Вěсем пěр-пěрин çине çакна ăса хывмалла тенěн пăхса илчěç Республикăри сумлă тренерсем, ертÿçěсем те ăмăртăва хутшăнма кăмăл тунисене ырă сăмахпа хавхалантарчěç.
В. Егорова ячěпе пěрремěш ăмăрту 1992 çулта Лантăш вăрманěн уçланкинче иртнине аса илчě район пуçлăхěн çумě В.Вязов. Çак ăмăртăва çулсеренех питě массăллă хутшăннине те палăртса хăварчě вăл. Çавăнпа та депутатсен районти Пухăвě кăçалхи ăмăрту валли «Массăллă хутшăннăшăн» номинаципе ятарлă кубок çирěплетни те ахальтен мар. Муркаш ял тăрăхě те хаклă парне хатěрленě.
Ăмăртăвăн тěп судйи А. Куликов программăпа паллаштарнă хыççăн чи малтанах ертÿçĕсен чупăвě пуçланчě. Вěсем хушшинче район администрацийěн пуçлăхě Ростислав Тимофеев: республикăри патшалăх тěп инженер инспекторě Владимир Димитриев та старта тухрĕç.
Тěслěхлě чупу хыççăн хăйсене чи кĕçĕннисем тĕрĕслерĕç. Маларах асăннă сумлă спортсменсем шăпах вěсене хавхалантарса пычĕç. Ку ушкăнра финиша малтан Максим Волков тата Мария Данилова çитрĕç. Иккěмěш вырăнта - Иван Егоровпа Милена Иванова, виççĕмĕшсем - Павел Сазоновпа Ирина Смирнова.
2003 - 2006 çулсенче çуралнисем те старта йышлăн тухрĕç. Кунта çĕнтерÿçĕсен ятне Анастасия Яковлева (Сыпай шкулĕ) тата Александр Ядыков (Муркашри вăтам шкул) тивĕçрĕç. 2000 çулта çуралнисен тата кĕçĕнреххисен ушкăнěнче Роман Куликов (Муркаш шкулě) тата Наталья Кольцова (Çатракасси шкулě) финиша пěрремěш çитрĕç. 1998 - 1999 çулсенче çуралнисенчен Анна Милютинăпа (Муркаш шкулě) Александр Клементьева (Чуманкасси шкулě) çитекеннисем пулмарĕç. 1996 - 1997 çулсенче çуралнă яшсенчен чи хăвăрт чупакан. Никита Николаев (Калайкасси шкулě), хěрсенчен Светлана Соколова (Ярапайкасси шкулě) пулчĕç 1994 çулта çуралнисен тата аслăраххисен ушкăнěнче Василий Данилов (Иваново облаçě) тата Елена Марсова (Мари Эл) палăрчĕç.
Ăмăртура вăтам тата тěп шкулсенчен мала тухнисене палăртрĕç. Вěсем - Калайкассинчи вăтам шкул тата Шетмěпуçĕнчи тěп шкул. Хыççăнхи вырăнсенче Муркашри вăтам шкулпа Сосновкăри тěп шкул, Çатракассинчи вăтам шкулпа Атапайри тěп шкул командисем пулчĕç.
60 çултан иртнĕ Ипполит Лобанова (Мари Эл), 70 урлă каçнă Аверкий Васильева (Чуманкасси ял тăрăх.) дипломсемпе чысларĕç. Ăмăртăвăн чи кĕçĕн спортсменě Арина Григорьева та çĕнтерÿçĕсен картлашки çине хăпарма тивĕç пулчěç.
СССР тава тивĕçлĕ спорт маçтăрě Алина Иванова та ăмăртăва парнесемсěр килмен. Роман Куликов, Анна Милютина тата Анжела Федорова (Тойкилтě) унăн парнисене тивěçрěç. Депутатсен районти Пухăвěн кубокне Хорнуй ял тăрăхě илсе кайрě. Муркаш ял тăрăхě çирěплетнě хаклă парнене ăмăртусене çÿллě шайра хатěрлесе ирттернěшěн В. Егорова ячěллě спорт шкулне пама кăмăл турě.
Муркашра çак спорт уявěпе çуллахи сезона хупрĕç. Малаллахи ăмăртусем вара спорта юратакансене спортзалсенче иртекен вăйăсенче тата йěлтěр йěрě çинче пěрле пухĕç.
Источник: "Çĕнтерÿ ялавĕ"