15 августа 2012 г.
Иртнě шăмат кун Муркашра çанталăкě те ытти çěртинчен хěвеллěрех пулчě пулě, çыннисем те савăнăçлăрах, илемлěрех курăнчěç.Слтав вара физкультурник куне халалан спартакиада. Муркаш ял тăрăхěнче ăна пěрремăш хут кăна ирттермеççě, анчах та ку хутěнче спартакиадăна спорта чăнласа юратакансем пуçтарăнни палăрчě. Пурте хăпартлануллă кăмăллă: шÿтлесе те иллеççě, стартсем умěнхи хусканусене те хаваспах тăваççě. Командăсенче çамрăксем ытлараххи те ырă шанчăк çуратмасăр хăвармарě.
Спартакиадăн тěп судйи Александр Куликов ăмăртусен программипе паллаштарчě: малтанах – эстафета, ун хыççăн – тěрлě енлě ăмăртусем.
Эстафета икě чупупа иртрě. Çавăнпа та кашниех лайăх вăхăт кăтартасишěн тăрăшрě. Кунта Муркашри пушар чаçěн команди хăй чи хăвăрттине çирěплетсе пачě. Тěрлě чупусенче ăмăртнă район администрацин тата Муркаш райпо командисен, финиша çитнě минучěсемпе çеккунчěсем пěр пекех пулнăран, иккěшěн хушшинче тепěр хут вăй виçме тиврě. Çапла вара райпо команди иккěмěш, администрации команди виççěмěш пулчě.
«Сывлăх» ФСК залсенче пěр вăхăтрах дартс, вăй гимнастики, сěтел çи теннисěн ăмăртăвěсем иртрěç. Дартсра тата сěтел çи тенниснче райпо команди палăрчě. Вăй гимнастикинче администрации командине çитекенни пулмарě. Вăл вăхăтра урамра пăшалтан тěл перекенсем те хăйсене тěрěслерěç. Кунта пухнă очкосемпе администраци команди мала тухрě.
Çак ăмăртусем пурте вěçленсен чи интересли пуçланчě – канат туртасси. Муркаш ял тăрăхěн тивěçěсене пурнăçлакан С.Н.Ермолаев спартакиадăна уçнă май спорт кăмăл туйăма çирěплетет, командăн кăмăл туйăмне вăйлатать тенине шăпах командăсем канат туртнă чух туллии туйса илме май пулчě те. Пěр-пěрне туйни, ăнланни – акă мěн хуçаланчě командăсенче. Уйрăмах пушар чаçěн, «Моргаушское» пурăнмалии çурт-йěрпе коммуналлă хуçалăхăн командисем кăмăл туйăм енчен çирěппине кăтартса пачěç. Мěнех, вěсен ěçě те çакна ыйтать. Апла пулин те ку кěрешÿре каллех администрации команди вăйлăрах пулчě.
Пур ăмăртури очкосене шутласа пěтěмлетнипе район администрацийěн команди çěнтерÿçě пулма тивěçрě. Хыççăнхи призлă вырăнсенче – райпо тата пушар чаçěн командисем. Тăваттăмěшпе пиллěкмěш вырăнсене Муркашри тěп больницăн тата «Моргаушское» пурнăмалии çурт-йěрпе коммуналлă хуçалăхăн командисем тухрěç.
Район администрацийĕн пуçлăхěн çумěсем Л.Тарасова тата В.Ананьев та спартакиадăна хаваспах сăнарěç. Владислав Кириллович Олимп вăййисенче чăваш спортсменěсем лайăх ăмăртни паянхи кун Муркашсене те хавхалантарасса шанса спартакиадăна уçнă май пурне те уявпа саламларě. Лилия Юрьевна вара ăмăрту пулансанах кам, тěрěсрех каласан мěн, çěнтерессине халех пěлетěп – командăсен пěрлехи кăмăл туйăмě, тесе пачах та йăнăшмарě. Çěнтерÿçĕсемпе призлă вырăн йышăннисене парнесемпе дипломсем парса чысланă чухне те спорта юратакансем çирěп команда мěн иккенне кăтартрěç. Команда ăнăçăвě кашнин çитěнěвěнче пулнине.
Муркаш ял тăрăхěн администрацийě хатрленě парнесем вара сывă пурнăç йěркине тытса пыма май параканнисем пулчĕç: шашка-шахмат наборěсем те, дартс та, мечěксем, бокс груши тата ытти тěрлě спорт хатěрě. Тинех чашăк тирĕк тата чейник мар – çак пěтěмлетÿ çийěнчех çуралчě, кăмăла татах та ытларах хăпартрě.
Источник: "Çĕнтерÿ ялавĕ"