19 февраля 2014 г.
Нумаях пулмасть районта Культура çулталăкне уçнине савăнăçлă лару-тăрура уявларĕç. Уяв каçĕнче пултаруллă культура ĕçченĕсене Чăваш Республикин Культура министерствин Хисеп грамотисемпе наградăларĕç.
Сумлă наградăна тивĕçнисенчен пĕри вăл – Хусанушкăнь ял тăрăхĕнчи Сĕнтĕкçырминчи библиотека заведующийĕ Елена Самсонова.
Елена Васильевна библиотека ĕçĕнче 1990 çултанпа тăрăшать, çак хушăра хăйне ырă енчен çеç кăтартнă. Вăл ертсе пынипе вулавăшра тăтăшах тĕрлĕ мероприятисемпе ыр кăмăллăх акцийĕсем иртеççĕ. Аслă пĕлÿллĕ библиотекарь пĕлĕвне ÿстерсех пырать, тĕрлĕ семинарсемпе професси ăсталăхĕн шкулĕсене хутшăнать. Хăйĕн тĕп тивĕçĕсене пурнăçланипе пĕрлех "Урпаш" фольклор ушкăнне те çÿрет. Ăста библиотекарь район шайĕнчи хисеп хучĕсене пĕрре кăна мар тивĕçнĕ, вăл – ĕç ветеранĕ.
А.КАРПОВА.
Источник: "Пирěн пурнăç"