Публикации » Туйсем кĕрленĕ, ачасем çуралнă

Район администрацийĕн ЗАГС пайĕн ĕçченĕсем 2012 çулта гражданла лару-тăрăвăн 688 актне регистрациленĕ. Вĕсенчен чылайăшĕ - ачасем çурални çинчен калаканнисем. Пĕлтĕр районта пурĕ 180 пепке – 95 хĕр ача тата 85 арçын ача – çуралнине шута илнĕ, 2011 çулхипе танлаштарсан 32 ача нумайрах. Кун çути курнисенчен 69-шĕ çемьере пĕрремĕш ачасем, 70-шĕ – иккĕмĕшсем, 28-шĕ – виççĕмĕшсем, саккăрăшĕ – тăваттăмĕшсем, виççĕшĕ – пиллĕкĕмĕшсем, пĕри – улттăмĕш ача.

Пĕлтĕр районта 85 мăшăршăн Мендельсон маршĕ янăранă, 2011 çулта вара çемье çавăрма кăмăллакансем ытларах пулнă – 101 мăшăр. Паллах, туй – асран тухми пулăм, анчах та чи пĕлтерĕшли – пĕр-пĕрне юратма тупа туса пĕрлешекенсем çемье вучахĕн ăшшине упрама пĕлни. Шел те, пĕлтĕр районта 41 çемье арканнă (2011 çулта – 33).

Туйсем кĕрлени, ачасем çурални паллах, савăнтарать. Анчах та çут çанталăк саккунĕ çапларах – чылайăшĕ пирĕнтен уйрăлса каять. Пĕлтĕр районта 351 çын вилнине шута илнĕ, 2011 çулхипе танлаштарсан – 79 çын сахалтарах.