06 ноября 2013 г.
Шкулсемпе аслă вĕренÿ учрежденийĕсем хыççăн вĕренÿ реформи ача сачĕсене çитрĕ. Шкул çулне çитмен ачасене мĕн кĕтет?
Ача сачĕсем çĕнĕ вĕренÿ стандарчĕпе ĕçлеме тытăнĕç
Асăннă документа Роспотребнадзорăн пăхса тухмалли, Юстици министерствинче регистрацилемелли юлнă. Çĕнĕ стандартпа килĕшÿллĕн шкул çулне çитмен ачан парта хушшине лариччен алфавитри сас паллисене е шутлама пĕлмесен те юрать. Анчах та унăн тимлĕхе палăртма, тĕрĕс калаçма, йĕрке-тирпей критерийĕсене йĕркелеме пĕлмелле.
Ача садне ямаллах-и?
Ашшĕ-амăшĕ малтанхи пекех тĕпренчĕкне мĕн шкула кайичченех ача садне ямасăр пултарать. Анчах та çĕнĕ стандарт 2014 çулхи январĕн 1-мĕшĕнчен вăя кĕрсен ашшĕ-амăшĕ виçĕ çултан иртнĕ ачине те ним чăрмавсăрах садике вырнаçтарĕ. Тĕп ушкăнра вырăн çук пулсан та кĕске вăхăтлăха вырнаçтарма тивĕç.
Тÿлев ÿсет-и?
Ашшĕ-амăшĕ малашне те ачисем апат çинĕшĕн тата вĕсене пăхнăшăн тÿлĕ. Воспитательсен ĕçĕ тата занятисем тÿлевсĕр юлĕç.
Патшалăхăн пĕрлехи экзаменне тытма тивмĕ-ши?
Çĕнĕ стандарт вăя кĕрсен ултă çулхи ачасен те экзамен тытас пулать-и? Çак ыйту чылай ашшĕ-амăшне пăшăрхантарать. Паллах, çук. Асăннă документ ытларах воспитательсене пырса тивет. Халĕ вĕсен хăйсен ĕçне планласа тухмалла, занятисене те унпа килĕшÿллĕн ирттермелле пулать. Стандартăн тĕллевĕ – ачалăха сыхласси.
А.АЛЕКСЕЕВА.