16 октября 2013 г.
Октябрĕн 10-мĕшĕнче Сĕнтĕкçырми ялĕнче пурăнакан Нина Корчагина хăйĕн 90 çулхи юбилейне кĕтсе илнĕ. Сумлă юбилей ячĕпе Нина Артемьевна патне Путинăн саламлă Çырăвĕ çитнĕ. Ăна ветеран патне Хусанушкăнь ял тăрăхĕн специалист-эксперчĕ Оксана Фролова çитернĕ, кинемее райадминистраци пуçлăхĕн Тав çырăвне парса саламланă, ырлăх-сывлăх, канлĕ ватлăх суннă.
Фронтра пулман пулин тевăрçă нушине самаях тÿснĕ кинеми.
Пилĕк çулти хĕр ача тăван мар амăшĕпе ÿснĕ. Çамрăклах аслисемпе пĕрле окопсем чавнă, тăван колхозра вăй хунă. Мăшăрĕпе, Сергей Федоровичпа, тăхăр ача çитĕнтерсе ÿстернĕ. Паянхи куна Нина Артемьевна Вячеслав ывăлĕн çемйипе пурăнать. Унăн хĕрĕсемпе ывăлĕсем çĕр-шывăн тĕрлĕ хулисене саланнă. Кинеми 23 мăнукĕпе 28 кĕçĕн мăнукĕ пурришĕн савăнать, çывăх тăванĕсен ăшшине туйса пурăнать.
Источник: "Пирěн пурнăç"