Публикации » Çÿхе пăр хăрушлăх кăларса тăратать

Умра – сивĕ кунсем. Çитес вăхăтра пĕвесем, кÿлĕсем, плотинăсем пăрпа витĕнĕç. Анчах та малтанхи çÿхе пăр чылай хăрушлăх кăларса тăратать. Калас пулать, уйрăмах ачасем çÿхе пăр çине кĕме кăмăллаççĕ.

Пирĕн район территорийĕнче пĕвесем, кÿлĕсем, плотинăсем сахал мар. Кунпа пĕрлех Сăр юхан шывĕ юхса иртет. Пăр хулăнăшĕ нихçан та пĕр пек шăнса лармасть. Юхан шыв варринчи пăр çÿхерех пулма пултарать. Çакна асра тытмалла: пĕр çынна 7 сантиметртан кая мар хулăнăш пăр тÿсет. Каток-мĕн тăвас тесен унăн хулăнăшĕ 12 сантиметр е ытларах та пулмалла. Пăр хулăнăшĕ 15 сантиметр ытларах пулсан кăна ун тăрăх çуран каçса çÿреме юрать. 30 сантиметр хулăнăшлĕ пăр çине автомашинăпа кĕмелле мар. Шыв температури 2 градус сивĕ пулсан çын унта 5-8 минут кăна тытăнса тăма пултарать.

Пĕтĕмĕшле илсен, пăр çинче асăрханулăх кирлĕ. Тимлĕхе ÿстерни инкек-синкекрен хăтăлма май парĕ