Публикации » Татăклă чарусем тата правилăсем

РФ территорийĕнче табак продукцине сутас ĕçе федераллă саккунсем йĕркелесе пыраççĕ.

Туртассине чармалли çинчен калакан саккуна çĕнĕлĕхсем, татăклă чарусем тата правилăсем хушăнаççĕ:

– туса кăларни, импортлани, сигаретсен курттăм тата вак суту-илĕвĕ гигиена нормисене пăхăнма кирлĕ. Вĕсенчи сиенлĕ хутăшсен виçи палăртнă нормăран иртмелле мар: фильтрлă сигаретсен – пĕр сигарет пуçне 14 мг сăмала тата 1,2 мг никотин, фильтрсăр сигаретсен – пĕр сигарет пуçне 16 мг сăмала тата 1,3 мг никотин пулмалла;

– пирусăн кашни пачки çинче унăн сиенĕ пирки калакан сăмахсем курăнмалла;

– сигаретсене, папироссене пĕрерĕн сутма чарни, çак ĕçре автоматсемпе усă курма пăрахтарни;

– вĕренÿÿ, культура, сывлăх сыхлавĕн, физкультурăпа спорт организацийĕсенче вĕсемпе сутă тума юраманни. Вăл ĕç вĕренÿ учрежденийĕнчен 100 метртан кая мар пурнăçланмалла;

– сигарет, папирос пачкисем çинче унăн хакĕ, сведенисем (хăçан тата ăçта кăларни) пулмалла;

– унăн хакĕ упаковкăринчен иртмелле мар;

– тавар, туртмалли-и вăл е чăмламалли-и, ĕммелли-и е шăршламалли-и, трубкăллă-и е кальянлă-и, упаковкăра пулма тивĕç. Упаковка виçи 500 грамран иртмелле мар. Продукци çинче ятарлă марка палли пулмалла.

Саккунпа килĕшÿллĕн 18 çул тултарман çамрăксене сигарет сутнăшăн çирĕпрех айăплама йышăннă. Сутакан граждансен кĕсйисене 1,5-2 пин тенкĕлĕх çÿхетме тивĕ, должноçри çынсен – 3-4 пин тенкĕлĕх, юридици сăпачĕсен – 30-40 пин тенкĕлĕх.

Административлă йĕркене пăсни çинчен протокол полици ĕçченĕсем е ятарлă органсем çыраççĕ.