Публикации » Уртаракан чиртен асăрханăр

Уртаракан чирпе ытларах ашпа тăранса пурăнакан тискер чĕр чунсем чирлеççĕ. Çыншăн вара çапкаланчăк йытăсемпе тилĕсем хăрушлăх кăларса тăратаççĕ. Уртаракан чир вирусĕ сурчăк урлă куçать. Уйрăмах пуçран е алăран çыртни хăрушă.

Хĕрлĕ Чутай ял тăрăхĕнче çапкаланса çÿрекен йытăсен шутне чакарас тĕллевпе вĕсене тытассине йĕркеленĕ, 16 йытă тытнă. Йытăсем уртаракан чирпе ан чирлеччĕр тесе ветеринари станци ĕçченĕсем ялсем тăрăх çÿресе прививка тăваççĕ, çынсем хушшинче ăнлантару ĕçĕсем йĕркелеççĕ.

Сунарçăсен обществипе пĕрле эпир 800 доза вакцинăллă астармăш (приманка) хурса вăрманти тискер чĕр чунсен тата тилĕсен иммунизацине йĕркелерĕмĕр.

Февраль уйăхĕнче Штанашра тата Упукушкăнь ялĕнче тилĕсене курнă. Сунарçăсем икĕ тиллине те тытнă, виллисене çунтарнă вырăна дезинфекциленĕ.

Ветеринари службипе вырăнти хăй тытăмлăх органĕсем уртаракан чирпе малалла та кĕрешĕç, профилактика ĕçĕсене те ирттерсех тăрĕç.