Публикации » Техника тĕрĕслевĕшĕн – 380 тенкĕ

Чăваш Республикин Министрсен Кабинечĕн 2011 çулхи декабрĕн 20-мĕшĕнчи 595 номерлĕ йышăнăвĕнче техника тĕрĕслевне ирттернĕшĕн тÿлемелли чи пысăк виçене палăртнă. Çак йышăнупа килĕшÿллĕн 2012 çулхи январĕн 1-мĕшĕнчен пассажирсене лартса çÿремелли, саккăртан ытла мар вырăнлă транспорт хатĕрĕсене (çăмăл автомобильсене) техника тĕрĕслевĕ витĕр кăларнăшăн 380 тенкĕрен ытла тÿлемелле мар.

2012 çулччен çăмăл автомобиле техника тĕрĕслевĕ витĕр кăларнăшăн 508 тенкĕ тÿлемелле пулнă: 300 тенкĕ – патшалăх пошлини, 208 тенкĕ – техника тĕрĕслевне ирттернĕ ĕçшĕн. Кăçалтан вара техника тĕрĕслевне уйрăм операторсем ирттернĕрен патшалăх пошлинине тÿлемелле мар.

Раççейĕпе илсен техника тĕрĕслевне ирттернĕшĕн тÿлемелли чи пысăк виçе Мускавра пулни паллă. Пирĕн республикăра çак виçе Атăлçи федераци округĕнчи ытти регионсенчи вăтам хаксенчен иртмест.