Публикации » Пĕвесене тасатаççĕ, ырлăх кÿреççĕ

Ялта кÿлĕ-пĕве пулсан хур-кăвакала çеç мар, çынсене те ырлăх. Пĕр-пĕр çĕрте япăхса юрăхсăра тухнă плотинăсем тахçанах çын аллине кĕтеççĕ. Тытса юсасчĕ те – пуçаруллă çынни çук.

Тихăнушкăнь ялĕнчи плотина пирки капла калаймăн. Кунта таса та тирпейлĕ, канма пур услови те пур... Ку тăрăхра тăван тавралăха юратакан, унăн илемĕшĕн чунтан çунакан çынсем пурăнаççĕ. Ахальтен мар çулсеренех çуркунне-кĕркунне йывăç лартса хăварма, территорие çÿп-çапран тасатма, çулсене юсавлă тытма тăрăшаççĕ. Тăрăшулăхĕ куç умĕнчех.

Пĕлтĕр шăрăх çанталăк тăнине шута илсе ку тăрăхри кашни ялта тенĕ пекех пĕвесем тунă. Кăçал вара çу кунĕсенче пĕвесене çирĕплетсе тасатас ĕçсене йĕркеленĕ. Нумаях пулмасть Тихăнушкăнь ялĕнчи пĕр пĕвене юшкăнран, курăкран тасатнă, унăн çыранĕсене çирĕплетнĕ. Ку ĕçре, паллах, техника вăйĕсĕр май килмен: бульдозера, трактора, экскаватора явăçтарнă.