Публикации » Вĕсем уйăхсерен йышланса пыраççĕ

Районта пурăнакансенчен "Ĕç ветеранĕ" ята тивĕçекенсем уйăхсерен йышланса пыни савăнтарать.

Чăваш Республикин Министрсен Кабинечĕн октябрĕн 12-мĕшĕнчи 428" йышăнăвĕпе килĕшÿллĕн пирĕн районтан тата виçĕ çын "Ĕç ветеранĕ" ята тивĕçрĕç, вĕсем – Малиновка ялĕнче пурăнакан Зоя Ивановна Еклакова, Шулюри Валерий Александрович Сетейкин, Тихăнушкăнчи Владимир Николаевич Угольников.

Зоя Ивановна Еклакова 1934 çулхи декабрĕн 10-мĕшĕнче Ишеккасси ялĕнче çуралнă. 1969 çулта Зоя Ивановна Ача амăшĕн медальне (II степень) тивĕçнĕ, 1980 çулта ăна "Ача амăшĕн мухтавĕ" орденпа чысланă.

Валерий Александрович Сетейкин 1951 çулхи сентябрĕн 7-мĕшĕнче Шулю ялĕнче кун çути курнă. Пурнăçĕ унăн тăван хуçалăхра – "Путь Ильича" колхозра – иртнĕ, пĕтĕмĕшле ĕç стажĕ унăн 46 çул. 1979 çулта Валерий Александрович "Социализмла ĕç ăмăртăвĕн çĕнтерÿçи" паллăна тивĕçнĕ.

Владимир Николаевич Угольников 1952 çулхи октябрĕн 14-мĕшĕнче çут тĕнчене килнĕ. Ĕç стажĕ унăн 41 çулпа танлашать. 1985 çулта Владимир Николаевич "Вун пĕрмĕш пилĕк çуллăх ударникĕ" паллăна тивĕçнĕ.