Публикации » Шкулсенче тĕрĕслев иртет

Шăрăх кунсем тăраççĕ пулин те шкулсенче халĕ хĕрÿ вăхăт. Кунта пĕтĕм вăя хурса çĕнĕ вĕренÿ çулне кĕтсе илме хатĕрленеççĕ. Çавна май вĕренÿ учрежденийĕсенче юсав ĕçĕсем чылай туса ирттернĕ. Таса та çутă классем халĕ ачасене кĕтеççĕ. Районта пурĕ 13 шкул, вăл шутра пĕтĕмĕшле пĕлÿ паракан 5 вăтам шкул, 5 тĕп шкул тата 3 пуçламăш шкул – ача сачĕ шутланать.

Шкулсенче тĕрĕслев ирттерес тĕллевпе вĕренÿ пайĕ ятарлă план-график туса хунă. Унпа килĕшÿллĕн ятарлă комисси шкулсене тухать. Паян, июлĕн 27-мĕшĕнче, Штанаш, Çĕн Атикасси, Тури Çĕрпÿкасси, Хусанушкăнь шкулĕсене çитсе лару-тăрупа паллашма палăртнă. Ыран тĕрĕслев Мăн Этмен, Пантьăк, Мишеркасси, Шулю, Серенкасси шкулĕсене çитĕ. Июлĕн 29-мĕшĕнче вара комисси Питĕркасси, Атнар, Хăмаркка тата Хĕрлĕ Чутай шкулĕсене тĕрĕслĕ.