Публикации » Сакăр тăлăх ача çуртлă пулĕ

Республика ашшĕ-амăшĕн хÿтлĕхĕсĕр юлнă тăлăхсене, çавăн пекех опекăна илнĕ ачасене çурт-йĕрпе тивĕçтерме укçа-тенкĕ уйăрать. Кăçалхи пĕрремĕш çур çулта района 3712, 5 пин тенкĕ куçнă, çав шутран республика бюджетĕнчен – 2970,0 пин тенкĕ, федераллă бюджетран – 742,5 пин тенкĕ. Социаллă найм килĕшĕвĕпе 5 тăлăх ача çурт-йĕрлĕ пулĕ (Хусанушкăнь ял тăрăхĕнчен – 1 ача, Пантьăк – 2, Ачкасси – 2). Унсăр пуçне июль уйăхĕнче республика бюджетĕнчен тата 3 тăлăх валли (Пантьăк, Кив Атикасси, Штанаш) – 2227,5 пин тенкĕ куçараççĕ.

Тăлăх ачасене пурăнмалли çурт-йĕрпе социаллă найм килĕшĕвĕпе вĕсем ăçта регистрациленнине кура тивĕçтереççĕ. Тăлăха нормăпа пурăнмалли çуртăн пĕтĕмĕшле лаптăкăн 33 тăваткал метрĕ кирлĕ. Кун пек ачасем валли çурт-йĕре туянаççĕ е ял тăрăхĕсен администрацийĕсем подряд килĕшĕвĕпе çĕклеççĕ. Ял тăрăхĕсен администрацийĕ пурăнмалли çурт-йĕре туянма е ăна çĕклеме аукцион ирттерет. Хăйсен çурт-йĕрне сутма кăмăл тăвакан граждансем ку аукциона хутшăнма пултараççĕ. Кун пек чухне никама пăхăнман хак параканăн (независимый оценщик) сутакан çурт-йĕрĕн рынок хакне хакламалла. Çавăн пекех сутакан çурт çине харпăрлăх ирĕкне çирĕплетекен свидетельство пулмалла. Интереслентерекен ыйтусемпе çÿлерех асăннă ял тăрăхĕсене çитмелле.