04 октября 2008 г.
Иртнĕ çулхи ноябрь уйăхĕнче ЧР Президенчĕ Чăваш Республикин культура вăй-хăватне малалла аталанма условисем туса парас тĕллевпе Указ йышăнчĕ.
Паянхи кун çак Указпа килĕшÿллĕн республикăри пур районсенче те ялти культура учрежденийĕсенче юсав ĕçĕсем пыраççĕ. Ку енĕпе районти лару-тăрупа паллашнă май, райадминистрацин социаллă аталану пайĕн начальникĕ А.Н.Самсонов çакна пĕлтерчĕ: Чăваш Республикин культура министерстви республикăри ялти культура учрежденийĕсене юсаса çĕнетес ĕçĕн 1-мĕш тапхăрĕ валли 10 миллион тенкĕ уйăрнă, вăл шутран 1 миллион та 200 пин тенки – пирĕн район валли. Çак укçаран 600-шер пинне Тралькассинчи тата Сĕнтĕкçырминчи Культура çурчĕсенче юсав ĕçĕсем тума уйăрнă. Çулталăк вĕçнелле вара республикăри 18 клуб учрежденийĕ тĕслĕхлисен шутне кĕрĕç, вĕсен шутĕнче Хĕрлĕ Чутай салинчи ял тăрăхĕсем хушшинчи культурăпа кану центрĕ те. Ноябрь уйăхĕнче вăл конкурса çĕнсе илнĕ 580 пин тенке тивĕçĕ.
Источник: "Пирěн пурнăç"