04 апреля 2008 г.
Тÿпери хĕвел хăйĕн ăшă пайăркисене тавралăха пĕр шелсĕр сапалать. Уй-хирте юр юлмарĕ те ĕнтĕ. Çакна курса-туйса тăракан специалистсем ял хуçалăх ĕçĕсене пуçларĕç.
Акă, «Коминтерн» ЯХПК уйĕсенче трактор кĕрлевĕ вăйланчĕ. Апрелĕн 3-мĕшĕнче кунта пĕрчĕллĕ культурăсен калчисене минерал удобренийĕсемпе апатлантарма тытăнчĕç. Малтанхи кунах 15 гектар йышăнакан лаптăкри ÿсен-тăрансене сеялкăпа усă курса минерал удобренийĕсем хывса хăварчĕç.
«Свобода» колхозра та нумай çул ÿсекен курăксене удобренисемпе апатлантарас ĕç пуçланнă.
Халĕ çĕр хăвăрт типет. Çакна шута илсе кашни хуçпалăхрах нÿрĕк тытса хăварас ĕçе пуçăнмалла. Чи малтанах çĕртме уйĕсене сÿрелемелле. Çавăн пекех районти хăш-пĕр хуçалăхсенче минерал удобренийĕсем çук. Вĕсенче вара вăтам тата йывăр сÿресемпе усă курса нÿрĕк ытларах сыхласа хăварма тăрăшмалла. Паянхи ĕçе ырана хăварни тыр-пул тухăçне палăрмаллах чакарни çинчен манас марччĕ.
Источник: "Пирěн пурнăç"