20 февраля 2008 г.
Февралĕн 12-мĕшĕнче шкулта çывхарса килекен Çĕршыва хÿтĕлекенсен кунĕ ячĕпе патриотла юрăсен концерчĕ пулчĕ.
Концерта 9-мĕш класс хĕрĕсем – Таня Мироновапа Валя Григорьева ертсе пычĕç. Кашни класс хăйĕн пултарулăхĕпе тĕлĕнтерчĕ. Кĕçĕн классем юрлани те кăмăла кайрĕ. Ачасем хăйсен хумханнине кăтартмасăр чуна пырса тивекен юрăсем шăрантарчĕç. Владимир Иванович Ильдер музыкант мĕнле вĕрентни тÿрех курăнать. Тен, ушкăнра юрланă чух хăвна лăпкăрах тытатăн пуль. Саша Аксаков вара (11 класс) икĕ юрă шăрантарчĕ. 8-мĕш класри Семен Давыдов та унран юлас темерĕ пулмалла, хăй пултарулăхне кăтартма васкарĕ.
Патриотла юрăсем урлă эпир çĕршыва сыхлакансен пурнăçне туйса тăратпăр. Эппин, çак концерта ирттерни те питĕ вырăнлă.