02 октября 2013 г.
Анапăра иртнĕ "Президент ăмăртăвĕсенчен" çĕнтерÿпе таврăннă Çĕн Атикасси шкулĕн вĕренекенĕсене тата вĕсен ертÿçине Светлана Петрейкинана шăмат кун, сентябрĕн 28-мĕшĕнче, Канашри чукун çул вокзалĕнче райадминистраци пуçлăхĕн пĕрремĕш çумĕн тивĕçĕсене пурнăçлаканĕ – вĕренÿ пайĕн начальникĕ Алексей Порфирьев, "Хастар" спорткомплекс директорĕ Вячеслав Дадюков, педагогсем, ашшĕ-амăшĕ кĕтсе илнĕ.
Тăван шкул, район, республика ятне, чысне çÿле çĕклеме пултарнă вĕренекенсене Çĕн Атикасси шкулĕнче те савăнăçлă лару-тăрура, ăшă сăмахсемпе, саламсемпе кĕтсе илнĕ.
Чăннипех те маттур ачасене ятран асăнар-ха: Мария Тимешкова, Эльвира Ильина, Ирина Пандакова, Анастасия Семенова, Андрей Семенов, Михаил Софронов, Дмитрий Ильин, Алексей Аксаков. Çирĕм кун хушшинче вĕсем нумай енлĕ хутăш ăмăртусене, эстафетăна хутшăнса, мини-футболла, баскетболла, бадминтонла, теннисла, шахматла выляса, ишсе, теорипе пултарулăх конкурсĕсенче хăйсене кăтартса 74 ял команди хушшинче пĕрремĕш вырăна тухма пултарнă.
Раççей шайĕнчи ăмăртусене ăнăçлă хутшăннă вĕренекенсене малашнехи çĕнтерÿсем сунатпăр.
А.КАРПОВА.
Источник: "Пирěн пурнăç"