Публикации » Патшалăх пулăшăвĕпе усă курнă

"АПК аталанăвĕ" наци проектне пурнăçа кĕртме тытăннăранпа районти ял хуçалăх таварĕсем туса кăларакансем выльăх-чĕрлĕх витисене юсама тата çĕнĕрен туса лартма кредитсемпе чылай усă курнă. Акă, ял хуçалăх предприятийĕсем çак тапхăрта 34,6 миллион тенкĕ, 1646 граждан 191,5 миллион тенкĕ илнĕ.

Агропромышленность комплексне кĕрекен организацисене кăçалхи тăхăр уйăхра пурĕ 22,3 миллион тенкĕ парса пулăшнă. Çав шутра федераллă бюджетран – 16 миллион, республика бюджетĕнчен – 6,3 миллион, район бюджетĕнчен – 500 пин тенкĕ. Хуçалăхсем элитлă вăрлăх туянма, нумай çул ÿсекен курăксем çитĕнтерме, ăратлă выльăх-чĕрлĕх ĕрчетме, минерал удобренийĕсем кÿрсе килме, ялăн социаллă аталанăвĕ валли, ÿсен-тăрансене хими им-çамĕпе хÿтĕлеме патшалăх пулăшăвĕпе усă курнă.

Районта малта пыракан хуçалăхсем – "Коминтерн", "Нива", "Свобода", "Дар-Бройлер", В.А.Никитин фермер хуçалăхĕ федераллă тата республика бюджетĕнчен паракан укçа-тенкĕпе усă курас енĕпе ыттисенчен аванрах ĕçленĕ.