06 декабря 2008 г.
Транспорт хатĕрне хăйсем çине регистрациленĕ граждансем транспорт налукне тÿлеме тивĕç. Налук виçине çав службăра ĕçлекенсем шутласа параççĕ.
Харпăр хăй автотранспорт тытнă, хальхи вăхăтра ăна сутнă е машина юрăхсăра тухнă пулсан та транспорт налукĕ тÿлемелли çинчен уведомлени килсен тĕлĕнме кирлĕ мар. Автотранспорт хатĕрне учетран кăларман пулсан транспорт налукне тÿлеме тиветех.
РФ Налук кодексĕ тăрăх транспорт налукне çулçÿрев хатĕрне регистрациленĕ мĕн пур сăпатсем тÿлеççĕ. Транспорт налукĕн йĕркисене пăхăнманнисене саккун тăрăх явап тыттараççĕ. Çавăнпа çул-йĕр çине тухма юрăхсăр автомашинăна вăхăта сая ямасăр ГИБДД уйрăмне кайса учетран кăлармалла. Транспорт хатĕрне учетран кăларас вăхăта саккунпа палăртман. Анчах та çÿреме юрăхсăр техникăшăн налук тÿлес килмесен ĕçе хăвăртлатмалла.
Источник: "Пирěн пурнăç"