01 марта 2008 г.
Кăçалхи мартăн 2-мĕшĕнче РФ Президенчĕн суйлавĕ иртнĕ май, Федераллă миграци службин Управленийĕн Чăваш Республикинчи Хĕрлĕ Чутай районĕнчи территори пункчĕ февралĕн 29-мĕшĕнчен пуçласа мартăн 2-мĕшĕччен Раççей Федерацийĕн гражданинĕн паспортне вăхăт çитнипе е çухатнине пула, хушамата ылмаштарнипе улăштарас ĕçсене вăхăтлăх пурнăçламасть. Çавăн пекех асăннă суйлавччен пурăнмалли вырăнта регистраци те тумаççĕ, регистраци учетĕнчен те кăлармаççĕ.
Аса илтерес килет, Федераллă миграци службин Управленийĕн районти территори пункчĕ 14 çул тултарнă çамрăксене паспорт парать. Унсăр пуçне кунта 20 тата 45 çула çитнисем, çирĕплетнĕ йĕркепе хушаматне е ятне, ашшĕ ятне, çурални çинчен кăтартнă сведенисене (кун, уйăх, çул е çуралнă вырăн) ылмаштарнине пула, паспортпа малалла усă курма май çуккипе (вăл вуçех кивелнĕ, юрăхсăра тухнă пулсан е урăх сăлтавпа), паспортра çырнинче йăнăш тупсан е çырса çитерейменнисем пулсан, сăн-сăпата улăштарсан çынсем урăх паспорт илме пултараççĕ. Асăннă службăн районти пункчĕ хăйĕн ĕçне паспорт парас е улăштарас йĕркесем тĕлĕшпе панă требованисемпе килĕшÿллĕн ĕçлесе пырать.
Источник: "Пирěн пурнăç"