22 августа 2007 г.
Уява спорт ăмăртăвĕсем пуянлатса пычĕç. Кăçал сывă пурнăç йĕркине тытса пыракансем йăлана кĕмен вăйăсене хутшăнса тупăшрĕç.
Кире пуканне хапха урлă çÿллĕшне ывăтассипе тата тиенĕ йывăр лава куçарассипе В.Дадюкова (спорт шкулĕн тренерĕ) çитекенни пулмарĕ.
Хĕрарăмсем шыв тултарнă витресене кĕвентепе йăтса чупассипе ăмăртрĕç. Ку енĕпе Г.Мидейкина (Хĕрлĕ Чутай гимназийĕ) çĕнтерÿçĕ пулчĕ.
Алă вăйне виçессипе хĕрарăмсен ушкăнĕнчен И.Родионова (спорт шкулĕн тренерĕ) палăрчĕ, арçынсенчен - Н.Ягункин (Хĕрлĕ Чутайри электричество сечĕсем” предприятин начальникĕ).
Волейболла выляма юратакансем хушшинче хĕрÿ тупăшу пулчĕ. Туктамăш ялĕнчи çамрăксен команди пурне те парăнтарса малти вырăна çĕнсе илчĕ.
Çăмăл атлетсен 4 х 100 эстафетăра Етĕрнери спортсменсем пĕрремĕш вырăна тивĕçрĕç, 4 х 400 эстафетăра вара Хĕрлĕ Чутай гимназийĕн команди çĕнтерÿçĕ пулчĕ.
Ял эстафетине (командăра 4 арçынпа 1 хĕрарăм) пысăк хавхаланупа хутшăнчĕç. Тĕрлĕ енлĕн тупăшса хĕрлĕчутайсем тивĕçлипех пĕрремĕш вырăна тухрĕç. Алевтинăпа Вячеслав Дадюковсем, В.Чернов, В.Герасимов, А.Михеев спортсменсем командăна очко парас тесе мĕн пур вăйран тупăшрĕç, вĕсемех çĕнтерчĕç.
Мини-футболла выляссипе Хĕрлĕ Чутай салинчи пĕрлештернĕ команда уяв парнине тивĕçрĕ. Хыççăнах республикăра мала тухассишĕн пыракан черетлĕ тур иртрĕ. “Резон” команда Йĕпреç районĕнчи футболистсемпе тĕл пулчĕ, вăйă 1 : 1 шутпа вĕçленчĕ.
Ирĕклĕ майпа кĕрешме юратакансем чĕрĕ парнене - така çĕнсе илессишĕн тупăшрĕç. 42 килограмм таякан отлетсенчен Дмитрий Ульянов, 70 килограмлисем хушшинче А.Еремеев çĕнтерÿçĕсем пулчĕç, унтан йывăртараххисенчен Канаш хулинчи А.Сергеев малти вырăна тухрĕ. Чемпионсене кашнине чĕрĕ парнепе наградăларĕç. Ытти категориллĕ виçесенче тупăшнисене укçан премипе чысларĕç.
Источник: "Пирěн пурнăç"