17 августа 2007 г.
РФ Президенчĕ палăртнă наци проекчĕсем халăх пурнăçне çăмăллатма тивĕç. Вĕсенчен пĕри - «Сывлăх» наци проекчĕ.
Районти халăх сывлăхне сыхласа хăварас тĕлĕшпе ăна пурнăçлассипе тăрăшаççĕ. Акă, кăçал 7 уйăх хушшинче ача çуратмалли сертификатăн 103 талонне панă. Иртнĕ çул наци проекчĕпе больницăн пурлăхпа техника никĕсĕ çирĕпленнĕ, райбольницăра çĕнĕ йышши оборудованисем вырнаçтарнă, района чи малтан икĕ шурă «ГАЗЕЛЬ», унтан икĕ медпулăшу автомашини килсе çитнĕ. Кăçал та районти сывлăх учрежденийĕ 2384000 тенкĕлĕх цифрăллă «RENEX» флюорографпа, 199053 тенкĕлĕх уретроцитоскоппа, 195755 тенкĕлĕх лаборатори оборудованийĕн комплекчĕпе (пурĕ 6 оборудовани: шăкри пĕтĕмĕшле белокăн анализаторĕ, гемоглобинометр, юнри глюкоза концентрацине виçекен экспресс, 10 кăтартăва палăртма пултаракан шăк анализаторĕ, лаборатори центрифуги тата медицина микроскопĕ) пуянланчĕ.
Çавăн пекех çак наци проекчĕпе килĕшÿллĕн халăха вакцинаци тума палăртнă. Акă, В гепатитран районти 2206 çынна прививка тума пăхса хунă пулсан, халиччен 1213 (55:) çынна тунă. Сăмах май, çак вакцинăна района 1340 виçе (доза) илсе килнĕ. Хĕрлĕхенрен вара 8-14 çулхи 420 ачана прививка тума палăртнă, 254-шне (60,5:) тунă та ĕнтĕ. 18-25 çулхи хĕрарăмсене вара пурĕ 300-шне вакцинацилемелле.
Источник: "Пирěн пурнăç"