27 июня 2007 г.
Халăха ĕçпе тивĕçтерекен районти центр предприяти-организацисемпе çыхăну тытса ĕçсĕр тăрса юлнă граждансене пулăшса тăрать: ĕç вырăнĕ тупса парать, тепĕр профессие алла илме вĕренме ярать тата ытти те. Çулталăк пуçланнăранпа ĕçпе тивĕçтерекен центр урлă 23 çын хăйсен пĕлĕвне ÿстерме вĕренме кайнă. Вĕсенчен 20-шĕ пĕлÿ илнĕ ĕнтĕ, 3-шĕ халĕ те вĕренеççĕ-ха. Палăртмалла, çак йышран ытларахăшĕ 29 çула çитменнисем.
Июнĕн 14-мĕшĕнче районти райпора, Шупашкарти кооператив техникумĕ урлă “Продавец-кассир-контролер” специальноçне алла илекенсен экзаменĕ иртрĕ. Унта 10 çамрăк пĕлÿ илчĕ. Комисси членĕсем çамрăксем суту-илÿре ĕçлеме çителĕклĕ пĕлÿ илнине палăртрĕç, лайăх хак пачĕç. Акă, вĕренекенсенчен 4-шĕ “5” паллăпа, 4-шĕ “4”, 2-шĕ “3” паллăсемпе курса вĕçлерĕç.
Калас пулать, ĕç шыракансенчен чылайăшĕ ПЭВМ операторĕ, сутуçă, кадрсемпе ĕçлекен менеджер профессине кăмăллани палăрать. Вĕсен кăмăлĕсене, ĕмĕт-тĕллевĕсене пурнăçа кĕртессипе центр ĕçченĕсем çине тăрса ĕçлеççĕ, тĕрĕс професси суйласа илме пулăшассипе тĕрлĕ занятисем ирттереççĕ.
Источник: "Пирěн пурнăç"