06 июня 2007 г.
Кам ăçта пултарать те, Хĕрлĕ Чутай салинче пурăнакан Дадюковсен çемйи вара спортра хастарлăх кăтартать. Хальлĕхе районта вĕсене çитекенни çук-ха.
Юлашки çулсенче Вячеслав Витальевичпа Алевтина Николаевна Дадюковсем тата вĕсен ывăлĕ Эдуард спорт çемйисен ăмăртăвĕсене час-часах хутшăнаççĕ. Вĕсене республикăра та аван паллаççĕ ĕнтĕ. Мĕншĕн тесен ÿсĕмĕсем пур, кăтартăвĕсем савăнтараççĕ. Район, республика чысне Раççей шайĕнче те хÿтĕленĕ. Акă, июнĕн 2-мĕшĕнче Дадюковсем республикăри спорт çемйисен фестивальне хутшăннă, ЧР Президенчĕн призне çĕнсе илессишĕн тупăшнă. Ăмăртусем çăмăл килмен, спорт çемйисем пĕри тепринчен маттур пулнă. Дартс, армспорт енĕпе, вырăнтан тăршшĕне сикессипе, баскетбол выляссипе, эстафета чупассипе Дадюковсем чи нумай очко пухса пĕрремĕш вырăн çĕнсе илнĕ, Физкультурăпа спорт тата туризм министерстви çĕнтерÿçĕ çемьене ЧР Президенчĕн Н.Федоровăн ячĕпе велосипед тата Диплом парса чысланă.
Дадюковсене республикăри чи пултаруллă спорт çемйи ята çĕнсе илнĕ ятпа саламлатпăр.
Источник: "Пирěн пурнăç"