Публикации » Ĕç династийĕсене чысларĕç

“Ĕç çынна чыс кÿрет”, - теççĕ. Ку чăнах та çапла. Пирĕн хушăра нумай çул хушши пĕр вырăнта чунне парса ĕçленĕ çынсем сахал мар. Çывăх тăвансем хушшинчех пĕр профессие суйласа илнисем те тĕл пулаççĕ. “Ĕç династийĕ малалла пырать”, - теççĕ ун чухне. Чылай чухне ашшĕ-амăшĕн çул-йĕрне ачисем, мăнукĕсем суйласа илеççĕ. Шăпах çакăн пек çемьесене юн кун, апрелĕн 26-мĕшĕнче, Ĕç династийĕсен районти слетĕнче чысларĕç.

Район пуçлăхĕн пĕрремĕш çумĕ Т.Н.Шереметьева мероприятие пухăннă династисене пархатарлă ĕçĕсемшĕн чунтан тав турĕ, ачисем ашшĕ-амăшĕн çулĕпе утнишĕн савăннине пĕлтерчĕ. Татьяна Николаевна куракансен йышĕ пĕчĕк пулнишĕн пăшăрханчĕ, малашне ку çитменлĕхе пĕтерме шантарчĕ. Çавăн пекех Т.Н.Шереметьева район пуçлăхĕн А.И.Криковăн Тав çырăвĕсене парса чысларĕ. Предприятисен ертÿçисем е представителĕсем хăйсем патĕнче  ĕçлесе ырă ята тивĕçнĕ ĕç династийĕсене парнесем парнелерĕç. Кашни çемье валли уйрăм музыка саламĕ пулчĕ.

Калас пулать, ку мероприятие 7 çемье хутшăнчĕ. Атнарти Ивантаевсен çемйин ял хуçалăхĕнчи (“Коминтерн” ЯХПК) пĕтĕмĕшле ĕç стажĕ - 239 çул. Районти почтамтра ĕçлесе тухнă Кудряшовсен çемйин стажĕ 66 çулпа танлашать. Тимаковсем вĕрентÿ ĕçне чунтанах  парăннă теме пулать. Хĕрлĕ Чутай гимназийĕнче тимлекен Галина Константиновнана, Ирина Алексеевна хĕрне, Эдуард Васильевич кĕрÿшне районта пĕлмен çын та çук пулĕ. Пĕтĕмĕшле ĕç стажĕ - 189 çул. Манейкинсен тухтăр çемйи те Хĕрлĕ Чутайра самаях паллă. Пĕтĕмĕшле ĕç стажĕ - 230 çул. Районти линипе техника цехĕнче Александр Васильевич Герасимов чылай ĕçленĕ. Халĕ ачисем çакăнтах тимлеççĕ. Пĕтĕмĕшле ĕç стажĕ - 163 çул. Мишеркассинчи Порфирьевсене те чылайăшĕ пĕлеççех ĕнтĕ. Вĕсем те вĕрентÿ ĕçне суйласа илнĕ. 91 çул пухăннă вĕсен ĕç стажĕ. Куколевсем вара вăрмана юратнипех пулĕ вăрман хуçалăхĕнче вăй хураççĕ. Çак çемье те 91 çул хушши вăрман пуянлăхне ÿстерессишĕн, ăна сыхлассишĕн тăрăшса ĕçленĕ.

Шулюри Окайкинсен çемйине вара уйрăм палăртса хăвармалла. Çак йăхри 19 çын пĕр вырăнта  - “Путь Ильича” колхозăн Шулюри ферминче ĕçлесе 428 çул таран пĕтĕмĕшле стаж пухнă. Зоя Петровна кунта 40 çул, Юрий Анатольевич мăшăрĕ çакăнтах 42 çул хушши тимленĕ. Иккĕшĕ 6 ача çитĕнтерсе пурнăç çулĕ çине кăларнă. Хăш-пĕр ачисем те вĕсем пекех ял хуçалăхне кăмăлланă. Çакна та палăртмалла, З.П.Окайкина хăйĕн вăхăтсăр çĕре кĕнĕ Вера хĕрĕн 4 ачине хÿтлĕхе илнĕ. Пирĕн районтан шăпах çак хисепе тивĕçлĕ, хăйсен юратнă ĕçне ăруран-ăрăва тăсакан Окайкинсен çемйи майăн 1-мĕшĕнче Шупашкарти К.Иванов ячĕллĕ Чăваш патшалăх академи драма театрĕнче  иртекен республикăри Ĕç династийĕсен слетне хутшăнма тивĕçлĕ пулчĕ. Социаллă ыйтусемпе тивĕçтерекен районти центрĕн çемьесемпе тата ачасемпе ĕçлекен пайĕн заведующийĕ Т.А. Карпова пĕлтернĕ тăрăх, Окайкинсене çак мероприятие тунти кун çитерсе каялла илсе килес ыйтăва центр хăй çине илет. Унта Ĕç династийĕсене чыслĕç, пысăк концертпа савăнтарĕç.