Публикации » Йывăçсем лартни – ырă ĕç

Республикăра "Йывăç ларт та ăна упра" акци пырать. Паянхи куна районта 6 пине яхăн йывăçпа тĕм лартнă, çак ĕçе район администрацийĕн, ял тăрăхĕсен, предприятисемпе организацисен ĕçченĕсем, шкул ачисем хутшăннă.

Сентябрĕн 21-мĕшĕнче районта Йывăç кунĕ иртнĕ. Чылай çĕрте йывăç лартас ĕç пахалăхлă иртнĕ. Питĕркасси ял тăрăхĕнче 1500 йывăç лартнă, вĕсенчен пин хурăн хунавне – Хурапырпа Кÿпеш ялĕсем хушшинче, 500 чăрăш хунавне – ял тăрăхĕн администрацийĕ вырнаçнă çурт çывăхĕнче.

Атнар ял тăрăхĕнче Кишлĕпе Березовка ялĕсем хушшинче1300 йывăç лартнă. Киватикассисем Акташ ялне каякан çул хĕррипе 1000 хунав лартса хăварнă.

Хĕрлĕ Чутай ял тăрăхĕнче те йывăç лартассипе тимленĕ: Ишеккассипе Туктамăш ялĕсенче 800 тĕм лартнă. Тралькассисемпе пантьăксем хăйсен тăрăхĕсенче 500-шер йывăç, мăнэтменсем çырма-çатраллă вырăнта, Çĕн Ирчемесри икĕ пĕве çывăхĕнче, 300 йывăç лартнă.

Йывăçсем лартас ĕç малалла та пулса пырĕ.