Публикации » Пĕвесене – иккĕмĕш пурнăç

Кăçал уйăхĕ-уйăхĕпе çумăр çуманнине пула типсе ларакан пĕвесен шучĕ кунран-кун ÿсет. Ытти çул шăрăх кунсенче хур-кăвакалпа шыва кĕме юратакансемшĕн чăн-чăн çăтмах пулнă пĕвесене аса илсе кулянмалли çеç юлать...

Анчах та кăмăл пулсан чăкăрташ çут çанталăк кăларса тăратнă йывăрлăхсене çĕнтерме пулатех. Паян районти хăш-пĕр ялсенче типсе ларнă пĕвесене тасатса йĕркене кĕртессипе ĕçсем пыраççĕ. Акă райпо Канашĕн председателĕ, район Пухăвĕн депутачĕ А.Ю.Степанов тăрăшнипе Ишеккассипе Тумликасси ялĕсенчи виçĕ пĕвене алтса çĕнетессипе ĕçлеççĕ. Тумликассинчи Клуб урамĕнчи пĕвене тасатнă та ĕнтĕ, ыттисене çак кунсенче тасатмалла.

Районта хăватлă техника çук тесе хăш-пĕр ертÿçĕсем (паянхи кунпа кăна пурăнаканнисем) пĕвесене тасатас ĕçе пуçăнаймаççĕ. Яваплăха туйса тăрăшсан техникине те, ĕçлекеннисене те тупма пулать.

"Пĕвене алтнă хыççăн тухнă тăпрана ял çыннисем пухăнса танлаштарса тухсан, çыран хĕррипе çатан карта тытсан аван пулмалла",– тет Александр Юрьевич.

Паллах, алтнă пĕвесем паянах шывпа туласса кĕтмелли çук. "Туррăн парасси пĕтмен", – теççĕ халăхра. Çумăрĕ те пулĕ-ха. Пĕвесемпе çăлсенче те шыв пулĕ.