Публикации » Шывпа пĕлсе усă курмалла

Шывсăр нушаланакан ялсем районта чылай, вĕсен шутĕнче – Тумликасси те. Юнашар Ишеккассинче колонкăсем пур, чылайăшĕн шыв пăрăхсем тăрăх килех кĕрет. Тумликассисем вара иккĕмĕш çул шывсăр пурăнаççĕ: çăлсемпе пĕвесем типнĕ, колонкăсем çук. Çавăнпа та çак ял çыннисем кÿршĕ ялти колонкăсенчен шыв тултаççĕ. Паллах, кил таврашĕнче усă курма илнĕшĕнех колонкăри шыв пĕтмест. Анчах та юлашки вăхăтра Ишеккассинчи тури урамсенчи колонкăсене шыв çитеймест. Сăлтавĕ – ял çыннисем шывпа пĕлсе усă курманнинче.

Çак ыйтăва пăхса тухма тата район администрацийĕн пуçлăхĕн Ю.Ивановăн район территорийĕнче чрезвычайлă лару-тăру режимне туса хуни çинчен калакан йышăнăвне ăнлантарса пама июлĕн 15-мĕшĕнче Хĕрлĕ Чутай ял тăрăхĕн пуçлăхĕ В.Романов Ишеккассипе Тумликассинче пурăнакансемпе тĕл пулса калаçрĕ. Валерий Константиновичпа ял тăрăхĕн специалисчĕсем шывпа перекетлĕ усă курмаллине, колонкăран анкартинчи курăка тата çĕр улми анисене шăварма юраманнине ăнлантарчĕç. Çавăн пекех шывпа усă курнăшăн миçе тенкĕ тÿлемеллипе, счетчиксем лартассипе, пĕвесем тăвассипе çыхăннă ыйтусене сÿтсе яврĕç.