Публикации » Кăмăл кĕрешÿре пиçĕхет

Июлĕн 3-мĕшĕнче Хĕрлĕ Чутай район адмнистрацийĕн пуçлăхĕн парнисене çĕнсе илессишĕн район цетрĕнчи спорт шкулĕнче ирĕклĕ майпа кĕрешессипе республикăри турнир иртрĕ.

Ăмăрту 10 сехетре пуçланчĕ, тепĕр икĕ сехетрен ăна савă нăçлă лару-тăрура уçрĕç. Умра – сумлă хăнасем. Вĕсен йышне РФ Патшалăх Думин депутачĕ, "Пĕрлĕхлĕ Раççей" фракцин членĕ, ЧР ирĕклĕ майпа кĕрешес федерацин президенчĕ П.Семенов, физкультурăпа спорт тата туризм министрĕн çумĕ А.Яковлев, "Раççей" профсоюзсен спорт обществин тĕп Канашĕн президенчĕ Г.Шибаев, "Раççей" профсоюзсен спорт обществин тĕп Канаш Федерацин вице-президенчĕ, Санкт-Петербург хулипе Ленинград облаçĕсен президенчĕ Л.Шиянов, ЧР наркотиксен çаврăнăшне тĕрĕслекен управленин начальникĕн çумĕ В.Самаркин, Раççей Оборона министерствин Чăваш Енри çар комиссариачĕн çар службине контракт мелĕпе ирттерессипе граждансене пухас, хатĕрлес енĕпе ĕçлекен пайăн начальникĕ С.Козюр, Хĕрлĕ Чутай тата Етĕрне районĕсен çар комиссариачĕн начальникĕ А.Прокопьев кĕреççĕ.

Район администрацийĕн пуçлăхĕ Ю.Иванов пухăннисене хăнасемпе паллаштарнă хыççăн спортсменсене ăнăçу сунчĕ.

– Пирĕн çамрăк спортсменсем спортра çитĕнÿсем туса ашшĕ-амăшĕсене, тăванĕсене савăнтарĕç. Ку ăмăртура вăйли çĕнтертĕр, – палăртрĕ Юрий Иванович.

Патшалăх Думин депутачĕ П.Семенов сывлăха çирĕплетекен, хитрелĕхпе вăя кăтартакан уявпа – ирĕклĕ майпа кĕрешессипе иртекен республикăри турнир уçăлнă ятпа саламларĕ, çывăх вăхăтрах пирĕн районта та физкультурăпа спорт комплексĕ хута каяссине пĕлтерчĕ. ЧР наркотиксен çаврăнăшне тĕрĕслекен управленин начальникĕн çумĕ В.Самаркин сывă-пурнăç йĕркине пропагандăланăшăн ДОСААФ ертÿçине В.Егорова, Мучикассинчи А.Офишкина Хисеп грамотипе чысларĕ.

Хăнасенчен уяв саламĕсем йышăннă хыççăн спортсменсем кĕрешĕве малалла тăсрĕç. Вăрнар, Красноармейски, Çĕрпÿÿ, Патăрьел районĕсенчен, Канашпа Шупашкар хулисенчен килсе çитнĕ спортсменсем питех те çивĕч кĕрешрĕç. Хамăрăн район чысне вара К.Волков, И.Петрейкин, Д.Ульянов, А.Еклаков, А.Петров, А.Ульянов, Д.Журавлев, С.Филиппов, Ю.Дмитриев, С.Волков, И.Филиппов, В.Лазарев, Н.Шихранкин хÿтĕлерĕç.

Кашниех ку турнирта çĕнтерме ăнтăлни палăрчĕ. Акă пиччĕшĕпе шăллĕ Кирилпа Станислав Волковсем хăйсен виçеллисем хушшинче кĕрешнĕ самантсем асран каймаççĕ. Юлашки вăй пĕтиччен кĕрешеççĕ вĕсем, пур пĕр район чысне ямаççĕ. Ирĕклĕ майпа кĕрешсе республикăра çеç мар, Кострома хулинче иртнĕ халăхсем хушшинчи турнирта çĕнтернĕ А.Ульяновшăн вара ăмăрту çăмăллăнах иртрĕ темелле. Вăл ăмăртура хирĕç кĕрешекенсене туххăмрах парăнтарчĕ. Саша хăйпе пĕр виçеллисем хушшинче малти вырăна тухма пултарни тĕлĕнтермест те. Паллах, спортра пурте çĕнтереймеççĕ. Çавна пула хăш-пĕр çамрăк спортсменсем шăпăртатса юхакан куççулĕсене чараймарĕç. Аманакансем те пулчĕç. Тухтăрсем вĕсене вăхăтра пулăшу кÿчĕç.

Чи çивĕччисем, çирĕп вăй-халлисем, чăтăмлисем, парăнма шутламаннисем – çĕнтерÿ пьедесталĕ çинче. 55 кг йывăрăш туртакан спортсменсенчен Д.Ульянов (Хĕрлĕ Чутай ял тăрăхĕ) пĕрремĕш вырăна тухрĕ, виççĕмĕш – Г.Праулов (Хусанушкăнь); 50 кг: К.Волков çĕнтерÿçĕ ята тивĕçрĕ, виççĕмĕш – И.Петрейкин (Хусанушкăнь); 42 кг: кунта та пирĕннисем çĕнтерчĕç, иккĕмĕш вырăна А.Еклаков çĕнсе илчĕ, виççĕмĕш – А.Петров (Хĕрлĕ Чутай); 38 кг: пĕрремĕш вырăна А.Ульянов тухрĕ, виççĕмĕш – Д.Журавлев (Хĕрлĕ Чутай); 35 кг: С.Филипповран (Хĕрлĕ Чутай) маттуртараххи никам та пулмарĕ, вăл çĕнтерÿçĕ; 30, 28 кг: виççĕмĕш вырăна Ю.Дмитриевпа (Хĕрлĕ Чутай) С.Волков (Хусанушкăнь) тивĕçрĕç. 62 кг йывăрăшлисем те ăмăртрĕç. Ăнăçу каллех пирĕн енче: И.Филиппов (Хĕрлĕ Чутай) пĕрремĕш вырăна тухрĕ. Малти вырăна йышăннисене пурне те паха парнесемпе тата медальсемпе, дипломсемпе наградăларĕç. Пĕрремĕш тухнисене – статуэтка. Кĕрешÿре çĕнтерме ăнтăлнишĕн Хусанушкăнь ял тăрăхĕнчи С.Волкова ятарлă парнепе хавхалантарчĕç. Кашни командăнах торт кĕтрĕ.

Çакна палăртмалла пулĕ, ку турнира тивĕçлĕ шайра ирттерессипе спонсорсем пысăк пулăшу кÿнĕ. Çавна май спортсменсем сумлă парнесене тивĕçрĕç.

Юлашкинчен çак турнира ертсе пыракан судьясемпе, спортсменсемпе район администрацийĕн пуçлăхĕ асăнмалăх сăн ÿкерĕнчĕ.

Кĕскен

Район администрацийĕн пуçлăхĕн парнисене çĕнсе илессишĕн ирĕклĕ майпа кĕрешессипе республикăри турнира районта ирттерни тăван тăрăхра спортăн çак тĕсне аталантарма пулăшасса шанас килет. Тĕрĕссипе, çирĕппĕнех аталанаймасть пулмалла пирĕн районта ирĕклĕ майпа кĕрешесси. Çакна эпĕ ăмăртура асăрхарăм. Район чысне хÿтĕленĕ спортсменсен пĕлтерĕшлĕ пайĕ ентешсем çеç шутланаççĕ, тăван тăрăхра пурăнакансем темиçен кăна.