Публикации » Çăла та шыв яраççĕ

Халăха таса шывпа тивĕçтерессипе Чăваш Енре ятарлă программа ĕçленине пурте пĕлетпĕр.

Республикăра та, районта та чылай ялсенче шыв ыйтăвне татса панă ĕнтĕ. Анчах та шывсăр нушаланакан ялсем те пур-ха. Çав шутра Тумликасси ялĕ те. Пĕлтĕр кĕр типĕ килчĕ те, çак ялти пĕвесемпе çăлсенче шыв юлмарĕ. Эх, шар кураççĕ-çке халĕ тумликассисем шыв çуккине пула! Юнашар Ишеккассинче пурăнакансемех пăрăх тăрăх килекен шывпа усă курса ыр кураççĕ.

"Вăрмана вутă турттармаççĕ, çăла шыв ямаççĕ", – тет ваттисен сăмахĕ. Паллах, ку сăмахсене тÿрремĕнех ăнланма кирлĕ мар, анчах та, аптăранă кăвакал кутăн чăмнă тенĕ пек, çăлĕсене шыв та ярса пăхрĕç вĕт кăçал тумликассисем! Усси кăна пулмарĕ. Шыв "тарать" çав вăл, çăла ăçтан ярса çитерĕн ăна; Тата шывĕ патне те колонкăна кÿршĕ Ишеккассине çÿремелле вĕт-ха. Кам çунашкапа, машина таврашĕ пуррисем – транспортпа шыв турттараççĕ. Вăй питти çынсем татах-ха, мучисемпе кинемейсемшĕн шыв кÿресси чĕр тамăк. Акă, Клуб урамĕнче пурăнакансем пичке-катка, бидон, хупăлчаллă витре, канистра таврашĕпе (камăн мĕнле савăт пур!) шыв тултнине пĕр пекех курма пулать. Шывсăр пурнăç çук-çке! Сăмах май, асăннă урамра вырнаçнă ача сачĕ те шыв çуккине пулах йывăрлăх тÿсет.

Çанталăка шанмалли çук, юр кăçал та сахал çурĕ, çуркунне çумăр та çумасан каллех шыв пулмасть. Апла пулсан, çанă тавăрсах çăлсене тарăнлатмалла-ши тумликассисен (çăмăл та, йÿнĕ те мар-ха ку ĕç!) е халăха таса шывпа çителĕклĕ таран тивĕçтересси кунта та пурнăçа кĕрессе шанмалла-ши?