Публикации » Çĕр улми вăрлăхне улăштарса тăмалла

Çăкăрпа çĕр улми нихăçан та йăлăхтарман апат-çимĕç шутланаççĕ, менюра тĕп вырăн йышăнаççĕ. Пĕри пулмасан ăна тепри улăштарать. Çĕр улмине "иккĕмĕш çăкăр" тени ăнсăртран çуралман ĕнтĕ. Выçлăх çулĕсенче вăл халăха вилĕмрен çăлнă.

Тĕнчери чухăнлăхпа кĕрешес ĕçре çĕр улми – пĕлтерĕшлĕ вырăнта. Пирĕн республика çĕршывра "иккĕмĕш çăкăр" çитĕнтерекен тĕп регионсенчен пĕри.

Юлашки çулсенче ял халăхĕ çĕр улми вăрлăхне улăштарманни сисĕнет, вуншар çул ĕнтĕ хутăшса пĕтнĕ вăрлăхсем лартаççĕ. Чылайăшĕн нÿхрепре халĕ шăтăклă-путăклă, чирлĕ çĕр улмисем кăна. Ун пеккисен çулран-çул тухăçĕ те чакса пырать, вĕсене сутса укçа тума та шанчăк пĕчĕк.

Çĕр улми ăнса пултăр тесен вăрлăха кашни çул пĕр лаптăк çинче лартмалла мар. Енчен те ун пек май çук пулсан пĕр çулхине ирех пулакан вăрлăха кая юлса пулаканни вырăнне лартса ÿстермелле, кашни çул çавăн пек ылмашу тума тăрăшмалла. Кун пек меслете пăхăнса пыма хуçалăхра пилĕк-ултă сорт çĕр улми пулмалла.

Çĕр улмин тухăçĕ вăрлăхран нумай килет, çавăнпа та вăрлăхĕ те элитлă е суперэлитлă пулмалла. Вăрлăха вара хамăр анкартинче те тăват-пилĕк çулта аталантарма май пур.

Ас тăвасса, вунă çул каялла çĕр улми сутса ял халăхĕ те, колхозсем те самаях услам тăватчĕç. Вăл вăхăтсенче çынсем 50 сотăй çĕр çинче çĕр улми туса илетчĕç ( вĕсен йышĕнче çак йĕркесен авторĕ те). Тĕлĕнмелле: паян вара çĕр улмине районти хуçалăхсенче те лартса туса илмеççĕ, çынсен анкартинче те пĕчĕк лаптăк çинче кăна курма пулать. Кун хыççăн ман ыйту çуралать: мĕн çиме юратаççĕ-ши вĕсем;! Хăвăрт пиçекен ролтон-ши; Профессионалсем çирĕплетнĕ тăрăх, çĕр улминчен 500 ытла кулинари шедеврĕ хатĕрлеме пулать вĕт. Ытти культурăсемпе танлаштарсан ку çимĕç тутлăхлă япаласемпе пуян.

Çуркунне çитнĕ май, райпо тытăмĕнчи хатĕрлев кантурĕ (ертÿçи – Евгений Викторович Соловьев) пулăшас тĕллевпе халăхран, çĕр улми вăрлăхне туянма кăмăллакансенчен, заявкăсем йышăнать (тел.: 2-17-36). Çавăн пекех заявкăсене ялсенчи лавккасенче тата район центрĕнчи "Сельхозпродукты" магазинта та йышăнаççĕ. "Ред Скарлетт", "Ромоно", "Роко", "Инноватор", "Невский", "Удача" тата ытти сортлă çĕр улми кирлĕ пулсан хатĕрлев кантурне е ялсенчи магазинсене хăвăр шухăшăра пĕлтерĕр.

Хăвăр ÿркенмесен, лартса ÿстернĕ çĕр улми çемье бюджетне çирĕплетме пулăшĕ, сĕтел çинчен техĕмлĕ апат-çимĕç татăлмĕ.