Публикации » Ишеккасси шкулĕн тĕрĕслевĕ çинчен

ЧР Роспотребнадзор управленийĕн Çĕмĕрлери территори уйрăмĕ кăçалхи январĕн 26-29-мĕшĕсенче Ишеккассинчи пуçламăш шкул-ача садне тĕрĕсленĕ. Тĕрĕслев вăхăтĕнче çак вĕрентÿ учрежденийĕ санитари саккунне пăснине палăртнă.

Шкул çулне çитменнисен ушкăнĕ Тумликасси клубĕн пурăнмалли мар пÿлĕмĕсенче вырнаçнă. Çак пурăнмалли мар пÿлĕмсене шкул çулне çитменнисен ушкăнне вырнаçтарассипе улшăнусем кĕртмен, санитари правилисене шута илмен. Кунта вĕрентÿ ĕç-хĕлне пурнăçлама усă куракан çуртсен, пÿлĕмсен е ытти пурлăхăн санитарипе эпидемиологи пĕтĕмлетĕвĕ çук. Шкул çулне çитменнисен ушкăнĕ валли пÿлĕмсем çителĕксĕр, прачечнăй, медицина тĕллевлĕ пÿлĕм çук, çав йышра изолятор та. Вылямалли тата çывăрмалли пÿлĕмсен лаптăкĕ çителĕксĕр. Кухньăра шăрша-марша туртса илекен вентиляцие йĕркелемен. Савăт-сапана çума ваннăйсем çук.

Шкул çулне çитменнисен ушкăнĕ вĕри шывпа тивĕçмест. Тирпей кÿме, савăт-сапана çума кухньăри тăватă конфоркăллă пĕртен-пĕр плита çинче шыв ăшăтаççĕ. Ушкăна шыв витрепе йăтаççĕ, ку ачасене е ĕçченсене суранлама пултарать. Паллах, плитан конфоркисем ачасене апат хатĕрлеме тата шыв ăшăтма çителĕксĕр. Вĕри шыв çителĕксĕррипе савăт-сапана çăвас правилăсем, санитарипе эпидемиологи йĕрки пăсăлаççĕ, пепкесем сивĕ шывпа çăвăнаççĕ. Асăннă фактсем инфекци чир-чĕрне сарма май параççĕ.

Ачасен сĕтел-пуканĕ те кивелнĕ.

Çуртăн çивиттийĕнчен шыв каять. Вылямалли, çăвăнмалли пÿлĕмсенчи маччасем çинче шыв сăрхăннипе йĕрсем палăраççĕ.

Кавирсене силлеме тата япаласене типĕтме лаптăк уйăрман. Вылямалли лаптăка хĕвелтен сулхăнлатма хупламан.

ЧР Роспотребнадзор управленийĕн Çĕмĕрлери территори уйрăмĕ Ишеккассинчи пуçламăш шкул-ача сачĕн шкул çулне çитменнисен ушкăнĕн ĕç-хĕлне чарса лартма йышăннă. Административлă ĕçĕн материалĕсене пăхса тухма Хĕрлĕ Чутай район судне ярса панă.