26 августа 2006 г.
Вăхăт çав тери хăвăрт шăвать. Акă, çуллахи шăрăх кунсем те хыçа юлаççĕ. Çамрăксем çулталăкăн чи илемлĕ те савăнăçлă саманчĕпе туллин савăнса юлма тăрăшаççĕ. Çулла çанталăкĕ те савăк тăрать, хĕрсемпе каччăсем те илемлĕрех курăнаççĕ. Мăн Этмен тăрăхĕнче вара çамрăксем уйрăмах хаваслăрах пурăнаççĕ тесе калас килет манăн, вĕсен пултарулăхĕ иксĕлми. Акă, çак кунсенче ялти Культура çуртĕнче «Мисс çулла - 2006» конкурс иртрĕ. Унта çамрăксем, ял çыннисем чылаййăн пухăнчĕç. Савăнăçлă мероприятие Шупашкарта Чăвашрадиора вăй хуракан Эльвирăпа Владимир Тимофеевсем килсе çитрĕç, вĕсемех ертсе пычĕç.
Чи малтанах конкурса йĕркелесе пыракансем пурне те уяв ячĕпе саламларĕç, конкурса хутшăнакансене ăнăçусем сунчĕç. Конкурса Пĕчĕк Этменти Оля Михеева, Шĕмшешри Жанна Михеевапа Оля Михеева хутшăнма кăмăл тунă. Хĕрсем виççĕшĕ те Шупашкарти тĕрлĕ вĕренÿ заведенийĕсенче пĕлÿ илеççĕ. Вĕсен пултарулăхне Т.В.Горбуновапа Е.М. Ельмова, Т.В.Артемьева жюри членĕсем хакларĕç.
Конкурс хĕр-пикесем хăйсене паллаштарнинчен пуçланчĕ. Ун хыççăн Пĕчĕк Этменти Оля Михеева «Твикс» лавккана (ертÿçи Э.Чикмейкин) интереслĕ рекламăласа пачĕ, куракансем ăна ăшшăн йышăнчĕç. Тутлă апат-çимĕç хатĕрлес конкурсра хĕрсем пысăк ăсталăхпа палăрчĕç. Мĕн кăна пĕçермен-ши вĕсем; Интеллектуаллă вăйăра хĕрсен кăткăс ыйтусене хуравламалла пулчĕ. Кунта та çухалса каймарĕç вĕсем, кашни ыйту çине тарăн та тулли хуравсем пачĕç. Юлашки конкурсра хĕр-пикесем куракансене хăйсен пултарулăхĕпе паллаштарчĕç. Оля Михеева (Пĕчĕк Этмен) уява килнисене инди халăх ташшипе тыткăнларĕ, ыттисем «Русские бабки» юрă- ташăпа савăнтарчĕç. Çакна та палăртмалла, кашни конкурс хыççăн Эльвира Немешкинапа Владимир Тимофеев çепĕç юрăсем шăрантарчĕç, халăх кăмăлне çĕклерĕç.
Çапла майпа, чи нумай балл пухса «Мисс çулла - 2006» номинацие Пĕчĕк Этменти Оля Михеева тивĕçрĕ, «Мисс илемлĕх» ята Жанна Михеева çĕнсе илчĕ, «Мисс илĕртÿлĕх» - Шĕмшешри Оля Михеева. Жюри членĕсем Мăн Этмен тăрăхĕнчи чи хитре те пултаруллă хĕрсене парнесем парса чысларĕç. Унтан Культура çурчĕн директорĕ М.Д.Михеева сăмах илчĕ. Вăл ку тăрăхра пурăнакан çамрăксен канăвне татах та интереслĕрех йĕркелесе пыма шантарчĕ, уяв каçĕпе питĕ кăмăллă пулнине пĕлтерчĕ.
Мăн Этменти уяв ташă каçĕпе вĕçленчĕ.
Конкурса ирттерме Э. В.Чикмейкинпа Т.В.Горбунова спонсорла пулăшу панă.
Источник: "Пирěн пурнăç"