31 июля 2013 г.
Мăн Этмен ялĕнче пурăнакан Трофимовсем – Вера Федоровнăпа Александр Петрович – хĕрĕх тăхăр çул пурнăç çулĕпе алла-аллăн утаççĕ.
Хĕрлĕ Чутай районĕн каччипе Çĕмĕрле районĕн хĕрĕ Чăваш патшалăх педагогика институтĕнче вĕреннĕ чух паллашнă. Часах çамрăксем хушшинчи туслăх юратăва куçнă, 1964 çулта вара Верăпа Александр çемье çавăрнă. Институтран вĕренсе тухса алла диплом илсен мăшăрсем пирĕн района таврăнса шкул ачисене вĕрентсе тивĕçлĕ воспитани парас ĕçе пуçăннă. Вера Федоровна педагогика ĕçĕнче 40 çул ытла тăрăшнă. Александр Петрович тĕрлĕ çулсенче учитель, класс тулашĕнчи ĕçсен йĕркелÿçи, директорăн вĕренÿ енĕпе ĕçлекен çумĕ, директор пулнă, пилĕк çул хушши районти вĕренÿ пайне ертсе пынă, унтан каллех шкулта ĕçленĕ.
Мăшăр пилĕк ача çуратса çитĕнтернĕ, ура çине тăратнă, пурне те аслă пĕлÿ панă. Халĕ Трофимовсем ачисемпе мăнукĕсен çитĕнĕвĕсемшĕн савăнса пурăнаççĕ.
Шăмат кун, июлĕн 13-мĕшĕнче, Райпо кунне ирттернĕ каç Вера Федоровнăпа Александр Петрович Трофимовсене ачисене тивĕçлĕ воспитани панăшăн тата çемье йăлисене çирĕплетнĕшĕн "Юратупа шанчăклăхшăн" медаль парса чысларĕç.
Палăртмалла, Александр Трофимов ятне вулакансем райхаçат страницисенче тăтăшах тĕл пулаççĕ, вăл – пирĕн штатра тăман обществăлла корреспондент, поэт, прозаик, публицист, куçаруçă, ултă кĕнеке авторĕ. Паян та эпир вулакансене унăн сăввисемпе паллашма сĕнесшĕн.
Первоисточник: "Пирeн пурнac"