Публикации » Пĕр чĕлхерен пурăнаççĕ

Ачана йĕркеллĕ çитĕнме, пурнăç илемĕпе киленсе пурăнма çемье, унăн ăшши кирлĕ. Лăпкăлăхпа ăшăлăх хуçаланакан çемьере ачасем те сăпайлă ÿсеççĕ. Мăн Этмен ялĕнче пурăнакан Александр Васильевичпа Альбина Анатольевна Ельмовсем те çемьери лăпкăлăха упрас тесе пĕр чĕлхерен пурăнма тăрăшаççĕ. Вĕсем çут тĕнчене виçĕ пепке парнеленĕ: икĕ хĕрпе пĕр ывăл. Тĕпренчĕкĕсемпе мăнаçланаççĕ вĕсем. Мухтанмалли сăлтавĕ те пур. Кăçал вĕсен аслă хĕрĕ – Елена – Мăн Этмен вăтам шкулне кĕмĕл медальпе вĕçлерĕ. Хĕрĕн ăнăçулăхĕнче ашшĕпе амăшĕн тÿпи пурри каламасăрах паллă. Вĕсем Еленăна шкулта вĕренсе пыма пур майсем те туса панă, кирлĕ вăхăтра канаш-сĕнÿпе пулăшнă.

Çемье пуçлăхĕ шалти ĕçсен пайĕнче тăрăшать. Йĕрке хуралĕнче ĕçленĕрен çемьере те пурте хăйĕн вырăнĕнче пулнине кăмăллать. Альбина Анатольевна вара лавккара сутуçăра тимлет.