Публикации » Çемьене чунтан парăннă

Кÿршĕсем, ял çыннисем, шкул ачисем, пĕрле ĕçленисем ăна Вера Васильевна тесе хисеплеççĕ. Вера çеç каласан вара кам-ха вăл тесе ыйтакан тупăнатех.

В.Кошелева Уйпуç ялĕнче 1957 çулта çуралнă, мамаккăшĕ, Вера ятлă пулнăран, ăна та çак ята хураççĕ. Хăйĕн ячĕ хĕрарăма килĕшет. Мĕнле-ха ăна кăмăлламăн; Енчен те мăшăрĕ, Александр Федорович, ачашшăн "Вера" тесе калать пулсан; Ачисем те, Алисăпа Дима, амăшне хисеплеççĕ. Вера Васильевна вĕсене тĕрĕс воспитани парса пурнăçра тĕрĕс çул-йĕр суйлама пулăшнă. Хĕрĕ паянхи кун Шупашкарта "Нарспи" ансамбльте ачасене ташлама вĕрентет. Ывăлĕ тĕп хулари электромеханика заводĕнче ĕçлет, çав хушăрах куçăмсăр майпа юриста вĕренет. Çĕршыва юрăхлă ачасем ÿстернĕ Кошелевсем. Ачисемпе вĕсем мухтанаççĕ. Халĕ Вера Васильевнапа Александр Федорович килте иккĕшех пурăнаççĕ. Мĕн пурнăç тăршшĕпех килĕштерсе пурăнать мăшăр. "Мăшăрпа нихăçан та вăрçăнса курман эпир", – тет Вера Васильевна. Çынпа та ырă кăмăллă пулма тăрăшать вăл, нушаллă çынсене хĕрхенет.