Публикации » Шăрантараççĕ чăваш юррине

Мăнэтменсем – юрра-ташша юратакан халăх. Уçă та янăравлă сассисемпе пĕр-пĕр юрă шăрантарса ярсан йывăç çинчи çулçă та хумханса илет. Ытла та илĕртÿллĕ, халăх кăмăлне каякан юрăсемпе савăнтараççĕ вĕсем.

Мăн Этменти Культура çурчĕ çумĕнче йĕркеленнĕ пултарулăх ушкăнĕ юрă-ташă енчен яланах малта пулнă. Пултарулăха туптама майĕсем те пур паллах. Культура çуртне çĕнетсе юсани те халăха клуба йыхравлать. Сăмах май, клуб ĕçне пĕтĕмпех чылай çул ĕнтĕ В.Михеева йĕркелесе пырать. Вăл вырăнти çынсен культура шайне, ырă йăли-йĕркисене упраса хăварассишĕн нумай тăрăшать.

Мăнэтменсем иртнĕ уйăхра Çимĕке хаваслă ирттерчĕç. Унта ватăсем те вырăнти артистсемпе тан юрласа ташларĕç, кăмăлĕсене çĕклерĕç. Çитес уяв августăн 2-мĕшĕнче, Илле пророк кунĕнче, Уйпуçпе Çĕн Ирчемес ялĕсенче пурăнакансем валли пулĕ.

Кичем мар ку тăрăхра пурăнакансене çакăн пек культура ĕçченĕсем пуррипе.