Публикации » Çамрăк инспекторсем ăмăртрĕç

Нумаях пулмасть Мăн Этмен вăтам шкулĕн территорийĕнче çамрăк инспекторсен конкурсĕ иртрĕ.

Çулсем çинче автомашинăсен йышĕ çултан-çул ÿсет. Шел те, чылайăшĕ пысăк хăвăртлăхпа çÿрет. Çавăнпа çул çине тухма хăрушăланчĕ. Çул çинчи инкексене ачасем ытларах лекеççĕ. Сăлтавĕ тĕрлĕрен: çул-йĕр правилисене пĕлменни, автоçул çинче тимлĕхсĕр пулни, аслисем ачасене асăрхаса çитерейменни...

Ачасем пăтăрмаха ан лекчĕр тесе ĕнтĕ районти шалти ĕçсен пайĕн ГИБДД ĕçченĕсем вĕрентÿ пайĕпе тата РОСТО Канашĕпе пĕрле кашни çулах çамрăк инспекторсен конкурсне йĕркелеççĕ. Мĕншĕн яланах Мăн Этмен шкулĕнче; Кунта шкул йĕри-тавра асфальт çул сарнă. Ачасене велосипедпа фигурăсем туса ярăнма условисем пур. Теори занятийĕсене ирттерме класс пÿлĕмĕсем те çителĕклĕ.

Палăртнă вăхăт çитсен, çамрăк инспекторсем конкурса хатĕрри çинчен рапорт пачĕç, 10-12 çулхи арçын ачасемпе хĕр ачасем тĕрлĕ номинацисенче пĕлĕве тĕрĕслеме классене вырнаçрĕç. Конкурса Тури Çĕрпÿкасси шкулĕсĕр пуçне пурте хутшăнчĕç. Çамрăк инспекторсен Çул-йĕр правилисене пĕлнине, инкеке лекнĕ çынна пĕрремĕш пулăшу мĕнле памаллине, велосипедпа чăрмавсем витĕр тĕрĕс тухмаллине кăтартмалла пулчĕ.

Конкурссен пĕтĕмлетĕвĕсем çапларах. Çул-йĕр правилисене пĕлессипе Хĕрлĕ Чутай шкулĕн вĕренекенĕсем пултаруллăрах пулчĕç – пĕрремĕш вырăн çĕнсе илчĕç. Уйрăмах К. Ярайкин пĕлĕвне лайăх хак памалла.

Медицина пулăшăвĕ парассине те Хĕрлĕ Чутай шкулĕн команди аван кăтартрĕ.

Чи интересли – велосипедпа тĕрлĕ фигурăсем туса ярăнасси, чăрмавсем витĕр тухасси. Трассăпа хăвăрт тата йăнăшсăр тухса çĕнтерÿçĕ ята Мăн

Этмен шкулĕн вĕренекенĕ Г.Мерзлайкин тивĕçрĕ.

Юлашкинчен конкурсантсем çул-йĕр темипе çыхăннă сăвăсемпе тата юрăсемпе паллаштарчĕç. Ку енĕпе мăнэтменсем пултаруллăрах пулчĕç.

Командăсен кĕрешĕвĕнче чи нумай очко пухса Хĕрлĕ Чутай вăтам шкулĕн вĕренекенĕсем çĕнтерчĕç. Вĕсемех район чысне республикăра хÿтĕлĕç. Иккĕмĕшпе виççĕмĕш вырăнсене Питĕркассипе Мăн Этмен шкулĕсем пайларĕç.