13 декабря 2008 г.
Мăн Этмен вăтам шкулĕнчи вĕрентекенсем ачасене пĕлÿ парас, воспитани енĕпе ĕçлес тĕлĕшпе лайăх енчен палăрса тăраççĕ.
Çакна районта тĕрлĕ предметпа иртнĕ олимпиадăсемпе конкурссен пĕтĕмлетĕвĕсем те çирĕплетеççĕ. Акă, асăннă шкулти вырăс чĕлхипе литература предмечĕсене вĕрентекен Ольга Николаевна Михееван класри ачасем те тарăн пĕлÿпе палăраççĕ. Класс тулашĕнчи тата обществăлла ĕçсене хастар хутшăнаççĕ.
Пуян опыт пухнă педагог уроксене тивĕçлĕ хатĕрленсе ирттерет, инновациллĕ мелсемпе усă курса ачасен тавра курăмне аталантарас тĕлĕшпе витĕмлĕ ĕç тăвать. Ольга Николаевна кашни кунах пултаруллă е юлса пыракан ачасемпе уроксем хыççăн уйрăмшаррăн ĕçлеме тăрăшать. Унăн вĕренекенĕсем юратнă учителĕ пекех сăвăсем хайлама, тарăн шухăшлă сочиненисем çырма кăмăллаççĕ. Иртнĕ вĕренÿ çулĕ вĕçĕнче унăн вĕренекенĕ Марина Толстова Çемье çулталăкне халалласа "Манăн çемье" сочиненипе Раççейри конкурса хутшăнма кăмăл тунă. Çавăн пекех О.Н.Михеева ертсе пынипе 5 вĕренекенĕ "Чи лайăх çыру урокĕ" Раççей шайĕнчи конкурсра палăрнă. Педагог хăй те творчествăлла ĕçсемпе çÿллĕ шайри ăслăлăх конференцийĕсене хутшăннă. 2008 çулхи май уйăхĕнче О.Н. Михеева республика шайĕнчи "Уçă урок" фестивале хутшăнса Хисеп грамоти çĕнсе илнĕ. "Вĕрентÿÿ" наци проектне пурнăçласа педагог район пуçлăхĕн премине çĕнсе илессишĕн пынă "Чи лайăх учитель" конкурсра вăй виçнĕ. Класс ертÿçисен профессиллĕ ăсталăхĕшĕн пынă конкурсра та хăйĕн пултарулăхне тĕрĕсленĕ вăл. "Аслă классенче вĕренекенсене вырăс чĕлхипе Пĕрлĕхлĕ патшалăх экзаменĕсене хатĕрлесси" темăпа ăслăлăх конференцийĕсенче час-часах ăна тухса калаçма шанаççĕ. Хăйĕн пултарулăхĕпе тĕрлĕ проектсене хутшăнса ырă ятсене тивĕçнĕ тĕслĕхсем унăн темиçе те, пурне те асăнса та пĕтереймĕн. Вĕренекенĕсем районти ăмăртусенче кăна мар, республика, Раççей шайĕнчи конкурссенче вăй виçеççĕ.
Мĕнех калăн, О.Н. Михеева – пур енлĕ талантлă педагог. Вĕрентÿ ĕçĕнче пысăк ÿсĕм тăвать. Паллах, тăрăшмасăр, вăй-хумасăр пулмаççĕ çак çитĕнÿсем. Çавăнпа коллективра та ырă ятпа çÿрет, вĕренекенĕсем хисеплеççĕ. Çакăнтан пахи мĕн пур-ши тата педагогшăн; Ĕçре, шкулта, ачасем хушшинче чун канăçне тупать вăл. Урăхла пулма та пултараймасть.
Вĕрентÿ тытăмĕ çĕнелсе, улшăнса пынă май, самана таппи педагогсене уйрăмах яваплăха туйса ĕçлеме, инновациллĕ проектсене хутшăнма хистет. О.Н.Михеева шăпах çавăн йышшисенчен пĕри. Вăл йывăрлăхсене çĕнтерсе пырса, профессиллĕ ăсталăха ÿстерсе, ачасем çĕршыва юрăхлă çынсем пулса ÿсчĕр тесе чуна парса ĕçлет. Ахальтен мар пултаруллă педагога вĕрентÿри пархатарлă ĕçсемшĕн тата обществăлла мероприятисене хастар хутшăннăшăн ЧР Вĕрентÿ министерствин, район пуçлăхĕн, вĕрентÿ пайĕн, ял администрацийĕн, вырăнти ял тăрăхĕн пуçлăхĕн Хисеп грамотисемпе темиçе хутчен те чысланă. Унăн ĕçне тивĕçлĕ хак пани педагога татах та тăрăшарах ĕçлеме хистет.
Вĕрентсе ăс-тăн панăшăн, çын пулмашкăн вĕрентнĕшĕн Ольга Николаевнана унăн выпускникĕсем тата паянхи кун парта хушшинче ларакансем яланах ырăпа асăнччăр, сума суччăр.
Источник: "Пирěн пурнăç"