15 августа 2007 г.
Атнар ялĕнче пурăнакан Осип Иванович Абрамов июлĕн 29-мĕшĕнче 80 çул тултарнă.
Осип Иванович Абрамова таврара лайăх пĕлеççĕ. Вăл ĕмĕрĕпех тăван хуçалăхра тăрăшнă, ăста утарçă та. Вĕсен йăхĕнче ĕлĕкренех килте вĕлле хурчĕсем тытнă. Осип Иванович та çак ăсталăха вĕренсе ÿснĕ, халĕ хăй те хурт-хăмăр тытать.
Халĕ О.И.Абрамов 80 çулта. Апла пулин те çав çулти çын тесе калаймăн ăна. Халĕ те ĕçре, вĕлле хурчĕсемпе тăрмашать, çивĕч калаçать, шÿтлет. Ĕмĕр иртсе пырать пулин те, утса тухнă кун-çул шăпине ÿпкелемест вăл. Пурнăçа мăшăрĕпе тивĕçлĕ пурăнса ирттернĕ, ача-пăча ÿстернĕ, çын тунă.
Осип Иванович - вăрçă участникĕ. 1944 çулта çар ретне тăнă. Вăл Хабаровск, Иркутск, Манчжури хулисене тăшманран ирĕке кăларассишĕн çапăçнă. Вăрçăри паттăрлăхшăн ăна “Берлина илнĕшĕн”, “Японие çĕнтернĕшĕн” медальсемпе чысланă. Ытти юбилей медалĕсем те ветеранăн кăкăрне илем кÿреççĕ.
- Аслă Çĕнтерÿ кунĕнче эпир салтаксемпе пуйăсра пыраттăмăр, Хĕвел тухăçнелле каяттăмăр. Çав тери савăнтăмăр. Çар служби манăн вăрăма тăсăлчĕ. Тăван яла 1951 çулта çеç таврăнтăм, - терĕ аса илсе ветеран.
О.И.Абрамов хуçалăхри çăм таптаракан машинăпа чылай çул ĕçленĕ, çав хушăрах колхозăн утарĕсене (пурĕ 4 утар пулнă) пăхса тăнă. Тивĕçлĕ канăва тухсан та хăнăхнă ĕçрех тимленĕ. Вĕлле хурчĕ, вăрман, уçă сывлăш - уншăн чун канăçĕ.
Источник: "Пирěн пурнăç"