11 июля 2007 г.
Ял çыннин пурнăçĕ вырăнти производство мĕнле аталаннинчен нумай килет. Хăш-пĕр вырăнсенче ял хуçалăх предприятийĕсем те çурма вăйпа ĕçлеççĕ, халăх ĕç вырăнĕ çуккипе нушаланать. Кăçал Туканашри “Дар-Бройлер” чăх-чĕп фабрики хута кайнăранпа кунта чылайăшĕ ĕç вырăнĕ тупрĕ, тепĕр енчен ку район экономикине çĕклеме пулăшать.
Хăй вăхăтĕнче чăх-чĕп фабрикин ячĕ кĕрлесе тăнă, вырăнта пурăнакансем кунтан чăх-чĕп туяннă, фабрика хăйĕн продукцийĕпе савăнтарнă, тупăшлă ĕçленĕ. Кăçал кунта каллех пăр тапранчĕ тесе калас килет. Фабрикăра унпа пĕрлех чĕпĕ кăларакан цех хута кайрĕ, реконструкци ĕçĕсем малалла пыраççĕ. Пĕрремĕш бройлерсем, пурĕ 14 пин ытла, цехра чупса çÿреççĕ ĕнтĕ. Малашлăхра тата виçĕ цех ĕçлеттерме палăртаççĕ. Çывăх вăхăтра фабрикăна путене (перепелка) чĕпписене илсе килмелле. Ăна вырăнта ĕрчетсе яма шутлаççĕ. Н.Полякова (ветврач), А.Куропаткина, М.Вазикова, П.Юркова, Т.Боброва чĕпĕ пăхакансем кайăк-кĕшĕке çĕнĕ технологипе усă курса пăхса-сăнаса тăраççĕ. Хальхи вăхăтра чĕпĕсем 2-3 эрнене çитнĕ ĕнтĕ. Район çыннисем 540 грамм таякан “Хаббард-Иза” ăратлă бройлерсене туянма пуçланă ĕнтĕ.
Сăмах май, Туканашри чăх-чĕп фабрикинчи ĕçсене йĕркелесе пыракан Н.И.Лисаев ытти цехсене хута ярассишĕн нумай вăй хурать. Тĕпрен илсен, кунта ĕçлемелли чылай-ха, малашлăх планĕсем те пысăк. Чи пахи - фабрика ĕçе пуçăнни, чăх-чĕпсем ĕрчетме пуçлани.
Источник: "Пирěн пурнăç"