Публикации » Профилактика ĕçне вăйлатмалла

Район администрацийĕ çумĕнчи çул çитмен çамрăксемпе ĕçлекен комисси шалти ĕçсен пайĕн сотрудникĕсемпе, педагогсемпе право йĕркине пăсассине хирĕç кĕрешессипе тĕллевлĕ ĕçлет. Çавна май вĕсем йывăр çемьесене çитеççĕ, унти лару-тăрупа паллашаççĕ, ашшĕ-амăшĕсемпе тĕл пулса ачасен воспитанийĕпе кирлĕ пек ĕçлемелли пирки асăрхаттараççĕ, йĕркесĕр ачасене уйрăм тимлĕхре тытаççĕ, вĕсене тÿрĕ çул çине тăмаллине ăнлантараççĕ.

Паянхи кун тĕлне районти 49 çемьене, йĕркелĕхе пăснă 21 çул çитмен çамрăка профилактика учетне илнĕ. Палăртмалла, кăçал çамрăксем саккуна ытларах пăсни сисĕнет. Çулталăк пуçланнăранпа комисси çул çитмен çамрăксем пирки 59 материал пăхса тухнă. Ачасем обществăлла вырăнта эрех ĕçнишĕн, хулиганла ĕçсем тунишĕн, уголовнăй преступленишĕн милици аллине лекнĕ. Акă, октябрĕн 14-мĕшĕнче иртнĕ черетлĕ ларура комисси Çĕмĕрлери 6-мĕш номерлĕ училищĕн дирекцийĕ Анат Чутайра, Чурпайра, Атнарта пурăнакан каччăсем вĕренме çÿременни пирки ыйту тăратнине пăхса тухнă. Çавна май вĕсен ашшĕ-амăшĕсене, ачисене ларăва чĕннĕ. Шел те, комиссине Атнарти К. çамрăк килмен. Учетра тăракан яш каччă «шапашкăна» тухса кайнă иккен.

Çавăн пекех ларура Пантьăкри çамрăкăн (Шупашкарта вĕренет) дисциплинине пăхса тухнă. Вăл Анне монуменчĕ çывăхĕнче эрех ĕçнĕрен йĕрке хуралçисен аллине лекнĕ. Саккуна пăснă ачашăн ашшĕ-амăшне явап тыттарнă.

Аслисем чун тĕпренчĕкĕсене çемье ăшшине парса ÿстереймен тĕслĕхсене те сÿтсе явнă. Питĕркассинчи ватă çын мăнукĕшĕн тăрăшакан çукки пирки çăхав тăратнă.

Юлашкинчен ларăва пухăннисем çемьесенче йĕрке тăвас, çул çитменнисене тĕрĕс мар утăмран çăлас тĕллевпе профилактика ĕçне вăйлатмаллине каланă.