Публикации » Таса шыв ĕçмелле

Юлашки вăхăтра экологи хăрушлăхра пулни пирки чылай çыраççĕ. Юхан шывсемпе кÿлĕсем вараланса пыраççĕ, завод-фабрикăсем сывлăша сиенлĕ хутăшсем кăлараççĕ. Ялсенче те тирпейсĕр, çут çанталăка варалакан вырăнсем çук мар. Çавăнпа ĕçмелли таса шыв ыйтăвĕ çивĕч тăрать. Кунта РФ Правительстви халăха ĕçмелли таса шывпа тивĕçтересси пирки йышăну кăларни вырăнлă темелле. Ăна пурнăçа кĕртес тĕлĕшпе республикăра та, районта та тăрăшса ĕçлерĕç. Малашне те ку тĕлĕшпе çĕнĕрен те çĕнĕ программăсем хатĕрлеççĕ, çынсене таса шывпа çеç усă курмаллине ăнлантараççĕ. Мĕншĕн тесен скважинăри шыв таса, унра сывлăхшăн сиенлĕ, ăш-чике пăсакан бактерисем çук. Çакна ăнланса ĕнтĕ районти Ачкасси, Урикасси, Ишеккасси, Пантьăк ялĕсенче шыв уçлакан башньăсем вырнаçтарчĕç. Ял тăрăхĕсен пуçлăхĕсем вĕсене тивĕçлĕ ĕçлеттерсе, çынсене пахалăхлă шывпа тивĕçтерсе пыма тăрăшаççĕ.

Паян чылай ялсенче хăйсем чавнă пусăри шывпа усă кураççĕ. Анчах та çемçе те тутлă, тăп-тăрă шывра сывлăхшăн сиенлĕ япаласем пурри е çукки пирки шутласах каймастпăр. Хамăр куллен ĕçекен шыва тĕрĕслеттерместпĕр. Тĕрĕслев вара халăх усă куракан шывра тимĕр, бари, лити нумай пулнине палăртать. Бор виçерен нумайраххи сисĕнет. Çаксем сывлăхшăн хăрушă элементсем шутланаççĕ. Палăртса хăвармалла, çуркунне пусăри шыв вараланас хăрушлăх питĕ пысăк. Унта вара сывлăха хавшатакан бактерисем чылай пулаççĕ. Санитари правилисене пăхăнмасан чирлесе кайма пулать. Çавăнпа колонкăри шывпа усă курнин усси пысăк. Таса шыв çеç ĕçесчĕ.